APR na REG zizakina umukino wa mbere mu ya nyuma ya kamarampaka kuri uyu wa Gatatu, tariki ya 2 Nyakanga, muri BK Arena, batari kumwe n’aba bakinnyi b’inkingi za mwamba muri aya makipe.

Diarra w’imyaka 23 yagize uruhare rukomeye mu gufasha APR kugera ku mukino wa nyuma mu ya kamarampaka batsinze Patriots BBC imikino 3 kuri 2 muri 5 bakinnye.

Kuva yagera muri APR mu 2024, Diarra yafashije iyi kipe kwegukana igikombe cya Shampiyona y’u Rwanda ndetse n’icya Rwanda Cup. Diarra kandi yitwaye neza muri Basketball Africa League (BAL) 2025, afasha ikipe ye ndetse akaba yaregukanye igihembo cy'umukinnyi mwiza wugariye ku nshuro ya kabiri muri BAL.

Muri rusange, Diarra yakiniye APR imikino umunani muri BAL agira impuzandengo y’amanota 17.4 ku mukino, ndetse abuza imipira 11.6 kwinjira mu rucundura, abuza abandi gutsinda ku kigero cya 3.4 ku mukino, ndetse yaka umupira 1 kuri buri mukino.

Aliou Diarra na Jean Jacques Boissy bari inkingi za mwamba mu makipe yabo 

Ku rundi ruhande, Boissy w’imyaka 25 yafashije REG gutsinda UGB mu mikino itatu yose ya 1/2 ya kamarampaka.

Uyu mukinnyi yitwaye neza cyane muri shampiyona y’uyu mwaka, aho yatsinze amanota 32 ku mukino batsinze Patriots ndetse agatsinda amanota menshi mu mwaka wa Shampiyona usanzwe ubwo yatsindaga amanota 37 mu mukino bahuye na Orion.

Muri BAL, Boissy yakiniye Al Ahli Tripoli yo muri Libya, ayifasha kwegukana igikombe cyayo cya mbere batsinze Petro de Luanda. Yabaye kandi umukinnyi mwiza muri iyi mikino yabaga ku nshuro ya Gatanu ndetse aba Umunya-Senegal wa mbere wegukanye BAL.

Boissy usanzwe akinira REG BBC yabaye umukinnyi mwiza wa BAL 2025 ari kumwe na Al Ahli Tripoli