Kinyarwanda
English
Swahili
RDC: Abantu barenga 20 bapfuye mu mirwano hagati ya FARDC na ADF i Mambasa
Abantu barenga 20 barapfuye mu mirwano ikomeye yahuje Ingabo za Leta ya Repubulika Iharanira Demokarasi ya Congo (FARDC) n’abarwanyi b’umutwe witwaje intwaro wa ADF (Allied Democratic Forces) mu gace ka Mambasa, mu Ntara ya Ituri.
Amakuru avuga ko iyi mirwano yasize abantu benshi bakomeretse bikomeye, barimo abasirikare n’abasivile.
Nk’uko Radio Okapi ibitangaza, imirwano yabereye mu bice bitandukanye bya Mambasa, aho ADF imaze igihe igaba ibitero ku ngabo za Leta ndetse no ku baturage. Iyi ntambara yateje umutekano muke n’ubwoba mu baturage, bamwe batangira guhunga ingo zabo.
Abakomerekejwe batwawe mu bigo nderabuzima bitandukanye kugira ngo bitabweho, mu gihe ubuyobozi bwemeza ko ibikorwa bya gisirikare bikomeje hagamijwe guhashya uwo mutwe witwaje intwaro.
ADF ni umwe mu mitwe imaze imyaka myinshi ihungabanya umutekano mu burasirazuba bwa RDC, by’umwihariko mu ntara za Ituri na Kivu y’Amajyaruguru, aho yakunze kwibasira abasivile.
Ubuyobozi n’abaturage bo muri Mambasa barasaba Leta kongera ingamba z’umutekano no kurinda abasivile bakomeje kwibasirwa n’imitwe yitwaje intwaro.
