Kuri uyu wa Kabiri tariki 1 Nyakanga 2025, ikipe ya Rayon Sports iratangira imyitozo ariko abakinnyi bahari ni mbarwa kuko bamwe ntibarahagera mu Rwanda.

Iyi myitozo iratangira ibera n'ubundi ahasanzwe ku kibuga cy'imyitozo cya Rayon Sports mu Nzove. Iyi myitozo iraza gutangira uyu munsi nta mufana wemerewe kuza kuyireba ndetse n'abanyamakuru.

Mu itangazo ubuyobozi bwa Rayon Sports bwahaye itangazamakuru, bwavuze ko abakeneye amashusho araza gutangwa n'abashinzwe itangazamakuru b'iyi kipe.

Iyi myitozo iratangira abakinnyi b'abanyamahanga ari bacye bijyanye n'uko abandi bagiye mu birumuhuko bataragera hano mu Rwanda. Abakinnyi b'abanyarwanda nabo hari abatarongererwa amasezerano. Abakinnyi b'abanyamahanga bahari ni Adama Bagayogo, Gloire Tambwe ndetse na Musore Prince.

Amakuru UKWELITIMES twamenye n'uko abakinnyi b'abanyamahanga bamenyesheje ubuyobozi bwa Rayon Sports ko bazava iwabo ari uko bishyuwe amafaranga y'imishahara iyi kipe ibafitiye. 

Intego ikomeye y'iyi myitozo, umutoza wa Rayon Sports Afhamia Lotfi araza kugerageza abakinnyi bashya barimo Rayane Hamouimeche ndetse na Mohamed Chely, mbere yo gusinya amasezerano.

Ikipe ya Rayon Sports iracyategereje umukinnyi w'umunyamahanga bivugwa ko azaba akina nka rutahizamu uzaza aje gufatanya na Fall Ngagne gushakira iyi kipe ibitego.