Kinyarwanda
English
Swahili
OMS yasabye Amerika gutanga amakuru y’inkomoko ya Covid-19
Ishami ry’Umuryango w’Abibumbye ryita ku Buzima OMS/WHO ryasabye Leta Zunze Ubumwe za Amerika gutanga amakuru yose ifite afite aho ahuriye n’inkomoko y’icyorezo cya Covid-19, nubwo icyo gihugu cyamaze kwivana muri uwo muryango.
Umuyobozi Mukuru wa OMS, Dr. Tedros Adhanom Ghebreyesus, mu kiganiro aherutse kugirana n’itangazamakuru yavuze ko hari ibihugu nka Amerika bituje kandi bifite amakuru yizewe y’ubutasi agaragaza inkomoko ya virusi ya SARS-CoV-2 yateje icyorezo cya Covid-19 nubwo ibyo bihugu bidashaka gutanga ayo makuru.
Yagize ati “Duhora dusaba ibihugu nka Leta Zunze Ubumwe za Amerika bifite amakuru afite aho ahuriye n’inkomoko ya virusi yateye icyorezo cya Covid-19, kuyaduha kugira ngo adufashe kurangiza iperereza ku nkomoko ya Covid-19. Ariko kugeza ubu ntayo turahabwa.”
Covid-19 yagaragaye bwa mbere mu mpera za 2019 mu mujyi wa Wuhan mu Bushinwa. OMS ivuga ko iki cyorezo cyahitanye abantu basaga miliyoni 20 ku Isi, gishegesha ubukungu bw’Isi, gisubiza inyuma inzego z’ubuzima ndetse gihindura ubuzima n’imibereho y’abatuye Isi.
OMS ivuga ko ikeneye amakuru yose afite aho ahuriye n’icyo cyorezo cya Covid-19 mu rwego rwo kumenya buri kimwe kuri cyo ndetse no kwirinda ko habaho icyorezo nk’icyo mu bihe biri imbere.
Ku wa 20 Mutarama 2025, ku munsi wa mbere agarutse ku butegetsi, Perezida wa Leta Zunze Ubumwe za Amerika, Donald Trump, yashyikirije OMS ibaruwa imenyesha ko Amerika igiye kuva muri uwo muryango, anashinja OMS kunanirwa kurinda abatuye Isi icyorezo cya Covid-19.
Leta ya Trump yashyikirije ku mugaragaro impapuro zivuga ko mu bushakashatsi yakoze yabonye icyorezo cya Covid-19 cyaba cyaratutse ku mpanuka yabereye muri laboratory ya Wuhan yakoraga isuzuma ku ndwara ziterwa na virusi mu Bushinwa, uretse ko OMS ivuga ko ayo makuru Amerika yatanze adahagije ndetse ko ariyo mpamvu irimo kuyaka andi afite ibimenyetso bifatika kuko iyafite ahubwo ikaba idashaka kuyagaragaza.
OMS ivuga ko nubwo Leta Zunze Ubumwe za Amerika zatanze ibaruwa isaba gusezera muri uwo muryango ariko ikiwufitiye umwenda wo mu 2024 na 2025 urenga miliyoni 260 z’amadolari ya Amerika.
OMS isaba ko habaho ubufatanye n’ubwisanzure mu gutanga amakuru, ivuga ko kumenya inkomoko ya Covid-19 bizafasha Isi kwitegura no gukumira ibyorezo bishobora kuzahaza Isi mu gihe kiri imbere nubwo kugeza ubu Leta ya Amerika ntacyo irabitangazaho.
