Kinyarwanda
English
Swahili
Nyarugenge: RIB yataye muri yombi abagaragaye bakubitira umuturage ku biro by’Akagari
Urwego rw’Igihugu rw’Ubugenzacyaha, RIB, rwatangaje ko rwataye muri yombi abantu baherutse kugaragara mu mashusho bakubitira umuntu mu biro by’Akagari ka Munanira ya I gaherereye mu Murenge wa Nyakabanda mu Karere ka Nyarugenge.
Ibi uru rwego rwabitangaje rubinyujije ku mbuga nkoranyambaga zarwo, kuri uyu wa 25 Nzeri 2025.
Uru rwego rwagaragaje ko aba bagabo bagaragaye mu mashusho bakubitira umuntu ku biro by’Akagari bafashwe binyuze mu bufatanye n’inzego z’umutekano zitandukanye.
Rwagize ruti “Ku bufatanye n’izindi nzego z’umutekano, hafashwe abantu bagaragaye mu mashusho bakubitira umuntu mu biro by’Akagari ka Munanira, mu Murenge wa Nyakabanda.”
RIB yakomeje yibutsa abantu ko umuntu wese ukora ibikorwa by’urugomo yitwaje umwanya afite cyangwa akazi akora ko bihanwa n’amategeko.
Yagize iti “RIB iributsa abantu ko umuntu wese ukora ibikorwa by’urugomo yitwaje umwanya afite cyangwa akazi akora ko bihanwa n’amategeko ikaba isaba abantu kwirinda kugwa mu bikorwa nk’ibyo.”
Yakomeje ivuga ko bafashwe bafungiye kuri Sitasiyo ya RIB ya Rwezamenyo mu Karere ka Nyarugenge mu gihe dosiye yabo igitunganywa kugira ngo ishyikirizwe Ubushyinjacyaha.
