Ku isaha ya saa Kumi n'ebyiri z'umugoroba zo ku wa mbere tariki 5 Mutarama 2026, nibwo umukino wahuje ikipe y'igihugu ya Misiri ndetse na Benin watangiye. Ni umukino utigeze worohera cyane Misiri bitandukanye nibyo benshi batekerezaga.

Ikipe zombi zanganyije igitego 1-1 mu minota 90, ariko ikipe y'igihugu ya Misiri iza gukora akazi kayo mu minota 30 y'inyongera nyuma yaho habuze itsinda indi mu minota 90. Abarimo Mohamed Salah, Yasser Ibrahim ndetse na Marwan Attia batsindiye Misiri naho igitego kimwe cya Benin cyatsinzwe na Jodel Dossou.

Ku isaha ya saa Tatu z'ijoro, hari hategerejwe kureba niba ikipe y'igihugu ya Nigeria ishobora gutungurwa na Mozambique ariko siko byagenze kuko ikipe y'igihugu ya Nigeria yitwaye neza inyagira Mozambique ibitego 4-0.

Ikipe y'igihugu ya Nigeria yatsindiwe na Ademola Lookman, Victor Osimhen atsinda ibitego 2 ndetse na Akor Adams. Uyu ni imwe mu mikino muri iki gikombe cy'Afurika, ikipe y'igihugu ya Nigeria yakinnye neza ndetse benshi bongera gutinya abakinnyi n'ubwitange batangiye kugira.

Ikipe y'igihugu ya Misiri ndetse na Nigeria nyuma yo kugera muri 1/4, ntabwo haramenyekana ikipe zizahura nazo. Kuri uyu wa Kabiri nibwo haraza kumenyekana izindi ziragera muri 1/4, nyuma y'imikino iraza guhuza Algeria na DR Congo, ndetse n'uw'urahuza ikipe y'igihugu ya Cote D'Ivoire na Burkina Faso.

Kugeza ubu muri iki gikombe cy'Afurika nta gutungurana gukomeye kurabamo cyane usibye umukino ikipe y'igihugu ya Mali yari ifite umutuku yasezereyemo ikipe y'igihugu ya Tunisia.

Misiri yageze muri 1/4 cy'igikombe cy'Afurika 

Ikipe y'igihugu ya Nigeria yageze muri 1/4 cy'igikombe cy'Afurika