Ikipe y'igihugu ya Afurika y'epfo niyo yatangiye yigaba mu kibuga ikina na Angola mu itsinda B. Afurika y'epfo yatangiye yitwara neza kuko ku munota wa 21 Oswin Appollis yatsinze igitego cya mbere gihita kishyurwa na Show ku munota wa 35. Afurika y'epfo ku munota wa 79 yaje kubona igitego cyayihesheje intsinzi gitsinzwe na Lyle Foster. 

Ku isaha ya saa Moya n'igice, ikipe ya Mali yakinnye umukino wayo na Zambia urangira ikipe zombi zinganyije igitego 1-1. Ku munota wa 61, Lassine Sinayoko yatsindiye Mali igitego cya mbere kiza kwishyurwa na Patson Daka ku ruhande rwa Zambia. Iri tsinda ryakinnye ni itsinda A. 

Ku isaha ya saa Ine z'ijoro hari hategerejwe umukino ikipe y'igihugu ya Misiri yari bukine na Zimbabwe wo mu itsinda B, waje kurangira Misiri ibonye amanota atatu nyuma yo gutsinda ibitego 2-1. Hakiri kare cyane ku munota wa 20, Prince Dube yatsinze igitego cya mbere ku ruhande rwa Zimbabwe kiza kwishyurwa ku munota wa 64 gitsinzwe na Omar Marmoush maze Mohamed Salah aza gutsinda igitego cyahesheje intsinzi Misiri ku munota wa 94.

Kuri uyu wa Kabiri harakomeza iyi mikino y'igikombe cy'Afurika aho ikipe ya DR Congo Saa Munani n'igice iraza gukina na Benin, Saa Kumi n'imwe Senegal iraza gukina na Botswana, aho iraba ari imikino yo mu itsinda C. Ku isaha ya saa Moya n'igice z'ijoro, Nigeria irakina na Tanzania naho Saa Ine Tunisia ikine na Uganda. Iyi mikino ni iyo mu itsinda D.

Ikipe y'igihugu ya Misiri yatsinze Zimbabwe ibitego 2-1

Ikipe y'igihugu ya Afurika y'epfo yitwaye neza imbere ya Angola