Uyu mukinnyi w’imyaka 33 yari afite iyi mvune mu gihe umwaka w’imikino wari ugoye cyane kuri Santos FC akinira, ariko yagize uruhare rukomeye mu gufasha iyi kipe kuva mu makipe ashobora kumanuka mu cyiciro cya kabiri muri shampiyona y'icyiciro cya mbere muri Brazil.

Santos FC yatangaje ko iki gikorwa cyo kubagwa cyakozwe n’umuganga w’ikipe y’igihugu ya Brazil, wanigeze no kubaga Neymar ubwo yavunikaga ikirenge ndetse n’igihe yizege kugira imvune y'Ivi itoroshye ya ACL yagize muri 2023.

Uku kubagwa kwa Neymar Jr byatumye hongera kugaruka icyizere ko ashobora kugaruka mu bitekerezo by'umutoza w'ikipe y'igihugu ya Brazil, Carlo Ancelotti, ubwo azahamagara abakinnyi bazaba bitegura Igikombe cy’Isi cya 2026.

Uyu mukinnyi wahoze akinira FC Barcelona na Paris Saint-Germain, ni we ufite agahigo ko gutsinda ibitego byinshi mu ikipe y’igihugu ya Brazil, aho amaze gutsinda ibitego 79 mu mikino 128, ariko amaze imyaka irenga ibiri adahamagarwa mu ikipe y'igihugu.

Neymar yasubiye muri iyi kipe yakuriyeho ya Santos FC muri Mutarama 2025, nyuma yo gukina imikino irindwi gusa mu gihe kirenga amezi 18 yari amaze muri Al-Hilal SC ikina Shampiyona ya Saudi Arabia.

Neymar yagize uruhare rukomeye mu kuguma kwa Santos mu cyiciro cya mbere, aho yakinanye ububabare bwo mu ivi maze atsinda ibitego bitanu mu mikino ine ya nyuma y’uyu mwaka w’imikino. Amasezerano ya Neymar na Santos azarangira mu mpera z’uyu mwaka, ariko ari mu biganiro n’iyi kipe bigamije kuyongera.