Ni umukino watangiye ku isaha ya saa Kumi n'ebyiri z'umugoroba zo kuri uyu wa Kane tariki 6 Werurwe 2025. Ni umukino wari ukomeye watangiye ikipe ya Rayon Sports yataka ariko kubona igitego biranga.

Ikipe ya Gorilla FC yagerageje kwataka ariko wabonaga irimo kugenda ihusha uburyo bumwe na bumwe ariko nanone ubona Rayon Sports irimo kugenda nayo igerageza kwataka ariko kubona igitego bikomeza kwanga.

Igice cya mbere urebye nta kintu gikomeye cyabayemo usibye umupira wa Gorilla FC wakubise igiti cy'izamu mu minota ya mbere ndetse iki gice kikaza kurangira ikipe zinganya 0-0.

Igice cya Kabiri cyatangiye ikipe ya Rayon Sports iri hejuru kuko wabonaga irimo kurusha cyane Gorilla FC uhereye hagati mu kibuga.

Ku munota wa 49, Rayon Sports yaje kubona igitego cya mbere cyatsinzwe na Iraguha Hadji ku mupira wazamukanwe na Biramahire Abeddy areba uko Hadji arimo gusaba umupira ahita amuhereza atsinda igitego.

Kuva kuri uyu munota Rayon Sports yahise itangira kwizera gukomeza muri 1/2 kuko yari imaze kujya imbere ya Gorilla FC.

Ikipe ya Gorilla FC yaje gukomeza kwataka izamu rya Rayon Sports kugirango irebe ko yakishyura ariko biranga.

Umutoza wa Rayon Sports Robertihno, mu minota hafi 65, yaje gukora impinduka avanamo abarimo Biramahire Abeddy, Assana Nah Innocent yinjiza mu kibuga abarimo Aziz Bassane ndetse na Adulai Jalo. Undi mukinnyi wavuyemo ni Ndayishimiye Richard yinjizamo Kanamuhire Roger.

Ikipe ya Rayon Sports yahise ikomera kurushaho cyane cyane mu kibuga hagati kuko kuva kuri uwo munota yahise itangira gukoresha abakinnyi barimo Muhire Kevin, Roger na Souleyman Daffe bose bari mu kibuga hagati.

Mu minota 5 y'inyongera, ikipe ya Gorilla FC yaje kubona kufura yari ahantu heza cyane kuko yari hafi y'urubuga rw'umuzamu rwa Kadime Ndiaye ariko ntiyagira ikivamo. 

Ubu buryo Gorilla FC yabonye bwaje bukurikiye ubwo Rayon Sports yabonye ariko ba rutahizamu bayo barimo Adulai Jalo ndetse na Aziz Bassane ntibagira icyo bakora.

Umukino waje kurangira ikipe ya Rayon Sports itsinze igitego 1-0, bituma ihita ikomeza muri 1/2 ku giteranyo cy'ibitego 3-2.

Uyu mukino wabonaga Gorilla FC ifite imbaraga nyinshi ariko ukabona hari utuntu inakora ubona ko ishaka kunganya ibitego bicye kuko byari buhite biyiha amahirwe yo gukomeza kubera ibitego 2 yari yatsindiye hanze.

Ubwo umukino wari umaze iminota micye utangiye, umusifuzi yaje guhagarika umukino kugirango bamwe mu bakinnyi bari mu gisibo cya Ramadhan, babanze gufata ifunguro umukino ubona gukomeza. Iki kiri mu byaranze uyu mukino.

Ikipe ya Rayon Sports nyuma yo gukomeza muri 1/2, igomba guhura na Mukura VS yakomeje isezereye Amagaju FC kuri Penalite 3-2 nyuma yaho ikipe zinganyije ibitego 2-2 mu mikino 2.

Abakunzi ba Rayon Sports ni bamwe mu bishimiye umusaruro w'ikipe yabo

Abakinnyi ba Rayon Sports bari mu gifungo cya Ramadhan bafata ifunguro