Nk’uko bitangazwa na MARCA, ivuga ko ishyirahamwe ry'umupira w'amagaru ku mugabane w'i Burayi, UEFA, yahanishije Lamine Yamal na Robert Lewandowski amande angana n'ibihumbi 5 by'amayero kuri buri umwe kubera kurengera amategeko ajyanye no kugenzura ikoreshwa ry’imiti yongera imbaraga nyuma y’umukino wa UEFA Champions League FC Barcelona iheruka gukina.

Ibi bihano byaturutse ku mukino FC Barcelona yakinnye na Inter Milan mu mukino wo kwishyura wa 1/2 cy’irangiza wabereye mu Butaliyani. Uyu mukino warangiye Barcelona itsinzwe na Inter Milan ibitego 4-3, bituma isezererwa muri iri rushanwa.

Nk’uko raporo ibivuga, UEFA yashyizeho amande y'ibihumbi 5 kuri buri mukinnyi kubera kutubahiriza amabwiriza y’umugenzuzi w’ikoreshwa ry’imiti yongera imbaraga no kudahita berekeza aho abakinnyi bapimirwa, nk’uko amategeko abisaba. Ibyo byatumye bacibwa aya amande.

Ntabwo Yamal na Lewandowski ari bo bahanwe gusa ahubwo n'umutoza wa FC Barcelona, Hansi Flick yahanishijwe kutazatoza umukino umwe wa UEFA Champions League ndetse akazanishyura ibihumbi 20 by'amayero kubera imyitwarire idahwitse yagaragaje kuri uyu mukino.

Ariko kandi ibi bihano byageze no ku mutoza wungirije, Marcus Sorg, nawe yaciwe amande angana n'ay'umutoza mukuru kuko nawe yagaragaje imyitwarire itari myiza kimwe na Hansi Flick.

Ibi bihano biraza guhita bitangira kubahirizwa, bityo Flick na Sorg ntibazaba bari ku ntebe y’abatoza mu mukino ubanza FC Barcelona izakina mu marushanwa yo ku mugabane w'i Burayi.

Uretse ibyo bihano byahawe abakinnyi n'abatoza, ariko Kandi na FC Barcelona yaciwe ibihumbi 5,250 by'amayero kubera abafana bayo bateye ibintu mu kibuga ndetse itegekwa kuzatanga ibihumbi 2,500 kubera abafana bakije ibishashi by’umuriro (fireworks) mu gihe uyu mukino wabaga.

Robert Lewandowski yahawe igihano na UEFA

Lamine Yamal yaciwe ampande na UEFA