Mu mikino ya gishuti Rayon Sports imaze iminsi ikina harimo uwo yatsinze AS Muhanga ibitego 4-0 ndetse n’uwo yatsinze Gasogi United ibitego 2-0 mu mukino wabereye mu karere ka Nyanza.

Ni mu cyumweru cya Rayon Sports cyiswe Rayon Week cyatangiye tariki 1 Kanama 2025. Umukino yatangiye ikina ni uwo yahuyemo na Gasogi United izakomeza ikina na Gorilla FC mu karere ka ngomba kuri uyu wa Gatatu tariki 6 Kanama 2025.

Rayon Sports ibinyujije ku mbuga nkoranyambaga mu ijoro ryo ku wa mbere, yabajije abakunzi bayo abakinnyi 3 babona bavamo aba-kapiteni bagomba kuyobora abandi muri uyu mwaka w’imikino.

Hari abakinnyi 3 bigaragara ko bafite ubushobozi bwo kuyobora bagenzi babo muri Rayon Sports. Aba bakinnyi barimo Serumogo Ally, Yousuou Diagne ndetse na Bigirimana Abedi ubona adaherezwa amahirwe menshi. Aba ni nabo barimo kugarukwaho cyane.

Kapiteni bamuhitamo bagendeye kuki? Reka tunarebe icyo aba bakinnyi bafite cyatuma havamo Kapiteni

Umutoza cyangwa ubuyobozi bw’ikipe akenshi buhitamo kapiteni bagendeye k’ubunararibonye

Kapiteni aba akenshi ari umukinnyi umaze igihe mu ikipe cyangwa amaze igihe akina ku rwego rwa Kinyamwuga. Urebye Serumogo Ally yaba umwe mu bahabwa amahiwe cyane bijyanye nuko muri Rayon Sports amazemo igihe kinini. Serumogo ari mu mwaka wa gatatu nk’umukinnyi w’iyi kipe bitandukanye n’aba bandi turimo kugarukaho.

Serumogo kandi amenyereye shampiyona kuva muri Sunrise FC, Kiyovu Sports ariko ni n’umukinnyi mukuru unyuze muri byinshi bikomeye bimuha ubushobozi bwo kuyobora bagenzi be.

Ugendeye kuri Yousou Diagne uri mu mwaka we wa kabiri nk’umukinnyi hano mu Rwanda. Uyu musore ubona ko nta kintu gihambaye aramenya muri iyi kipe usibyo ko nibyo amaze kumenya atari bicye ndetse byanamufasha kuko benshi bamubonamo ubushobozi.

Bigirimana Abedi nta gihe aramara muri Rayon Sports ariko kandi ni umukinnyi umaze igihe hano mu Rwanda nyuma yo gukina muri Kiyovu Sports imyaka 2 no muri Police FC ampara yo imyaka 2. Ibi bivuze ko azi byinshi ku mupira w’u Rwanda.

Ikindi ni ubuyobozi mu kibuga

Hari abakinnyi benshi mu kibuga uba ubona ari abayobozi cyane yo bigeze muri cya gihe ikipe isabwa gutsinda aba ashobora gufasha bagenzi be gutuza ndetse abongerera n’imbaraga

Urebye Serumogo Ally uko aba ameze mu kibuga, ubona ko avugana na bagenzi be bijyanye n’uko ashobora kuyobora bagenzi be mu kibuga ndetse akabafasha mu kubahumuriza no kubaha amabwiriza igihe bakeneye gutuza.

Tugarutse kuri Yousou Diagne, muri shampiyona ishize hari imikino yakinaga akaba ari we ubanza kubona igitego mu gihe iyi kipe byabaga byayigoye ndetse ukabona ko arimo kuvugisha bagenzi be cyane ndetse ukabona ko bamwumva.

Ibi bitandukanye n’ibyo Abedi we afite nubwo we muri Rayon Sports ubona ko atarisanga mu bandi. Igitandukanye uyu musore we afite nuko ubona abandi bakinnyi bato bamureberaho mu buryo bwo kwitwara neza no gukina bitanga icyizere. Iyo uganiriye n’abandi bakinnyi benshi bakunda uyu musore bitewe nuko yitwara mu kibuga mu gushakira ikipe intsinzi.

Umutoza nawe ashobora kugirira icyizere umukinnyi

Gutoranya Kapiteni bishobora gushingirwa ku cyizere umutoza n’abakinnyi bamufitiye, bakaba bazi ko ashobora kubahagararira neza imbere y’ubuyobozi n’itangazamakuru.

Rayon Sports kugeza ubu irimo gutozwa na Afhamia Lotfi. Urebye kuri iyi ngingo usibye Serumogo Ally na Bigirimana Abedi biragoye ko wavuga Yousou Diagne kuko ntabwo arakorana na Lotfi bijyanye nuko ataragera mu bandi bakinnyi ndetse ngo umutoza anarebe niba hari icyizere yamugira.

Guhitamo Kapiteni kandi hanagenderwa mu myitwarire

Kapiteni agomba kuba afite imyitwarire myiza mu kibuga no hanze yacyo, atari umuntu uhorana amakosa cyangwa amakimbirane. Bivuze ko akwiye kuba urugero rwiza ku bandi.

Biragoye kuvuga ko Serumogo Ally hari imyitwarire itari myiza agira yaba hanze y’ikibuga ndetse no hanze yacyo. Abedi urebye igihe amaze mu Rwanda ndetse ugakusanya amakuru usanga nta myitwarire mibi yagize. Naho Yousou Diagne we usibye kuba akirimo kugora ubuyobozi muri iki gihe atinda kuza mu myitozo naho muri shampiyona irangiye ntabwo yitwaye nabi.

Guhitamo kapiteni kandi hagenderwa no ku bumenyi umukinnyi afite mu kibuga

Umukinnyi uba kapiteni hari igihe bamuhitamo bagendeye ku kuba azi neza uburyo ikipe ikina, akumva neza amabwiriza y’umutoza, bityo akaba ashobora gufasha mugenzi we igihe ibintu bitagenze neza.

Urebye myugariro Serumogo Ally ukuntu arimo kwitwara mu kibuga arimo kwitwara neza. Ubona ko amayeri y’umutoza ayitwaramo neza cyane ndetse ni nawe uhari cyane ku mwanya we. Bigirimana Abedi yifujwe cyane n’umutoza ubona ko amufiteho ibitekerezo mu mikinire ye cyane.  

Akenshi kapiteni aba ari umukinnyi ushobora kuvugira abakinnyi mu ikipe

Kapiteni aba umuhuza hagati y’abakinnyi, abatoza, ubuyobozi ndetse n’abafana. Agomba kuba azi kuvugira bagenzi be no kumenyesha amakuru mu buryo buboneye. 

Umuyobozi hano aba afite ubumenyi mu kuvuga kandi ntahubuke mu ibintu byose abajije. Urebye aba bakinnyi mu itangazamakuru ntabwo bakunze kurijyamo cyane ariko kandi mu biganiro bajya bakora wumvako basubiza ibyo bitondeye.

Kapiteni agomba kuba afite ubushobozi bwo gutsinda no guhangana mu gihe bitoroshye

Kapiteni aba akwiye kuba afite imbaraga zo gufasha ikipe ikarwana no mu gihe byakomeye.

Ugendeye kuri iyi ngingo aba bakinnyi bose bayihuriyeho cyane kuko urebye Serumogo mu kibuga aba afite ishyaka mu gushakira ikipe intsinzi. Yousou Diagne yarabigaragaje mu mikino yakiniye Rayon Sports naho Bigirimana Abedi umwaka ishize muri Police FC nubwo wabonaga ititwara neza ariko yaragerageza agatsinda ndetse no muri Kiyovu Sports yitwaraga neza.

Ibi byose Rayon Sports irimo kubikora mu gihe irimo kwitegura umunsi w’Igikundiro uzaba ku wa 15 Kanama 2025 kuri Sitade Amahoro.   

Yousou Diagne myugariro wa Rayon Sports 

Serumogo Ally yongereye amasezerano muri Rayon Sports 

Bigirimana Abedi aravugwa mu ba Kapiteni ba Rayon Sports