Kinyarwanda
English
Swahili
Marocco yabyihariye hafi ya byose! CAF yatanze ibihembo by'abitwaye neza ku mugabane wa Afurika
Ibihembo by'abitwaye neza ku mugabane wa Afurika, byaraye bitanzwe abarimo Ashraf Hakim ndetse n'abandi bakomoka muri Marocco barabyiharira.
Ni ibihembo byatanzwe mu ijoro ryacyeye tariki 19 Ugushyingo 2025, bitangirwa muri Marocco mu mujyi wa Rabat.
Muri ibi bihembo byatangiye hatangwa igihembo cy'umukinnyi mwiza ukuri muto mu bagore cyegukanwe na Doha El Madani ukomoka mu gihugu cya Marocco. Haje kandi gutangwa igihembo cy'umukinnyi mwiza ukuri muto mu bagabo cyiza n'ubundi kwegukanwa n'umunya-Marocco witwa Othmane Maamma.
Igihembo cyari gikurikiye, ni igihembo cy'amakipe yitwaye neza y'igihugu muri uyu mwaka wa 2025, mu bagore cyegukanwe na Nigeria naho mu bagabo kino gihembo cyatwawe na Marocco y'abatarengeje imyaka 20 iheruka kwegukana igikombe cy'Isi mu batarengeje iyi myaka.
Muri ibi bihembo kandi hatanzwe igihembo cy'ikipe nziza mu ma Club akina kuri uyu mugabane wa Afurika. Iki gihembo cyatwawe na Pyramids FC ifite igikombe cya CAF Champions League giheruka. Haje kandi gutangwa igihembo cy'umukinnyi mwiza ukina kuri uyu mugabane wa Afurika, gitwarwa na Fiston Kalala Mayele ukinira Pyramids FC.
Igihembo cyari gikurikiye, ni igihembo cy'abazamu bitwaye neza muri uyu mwaka wa 2025, mu bagabo cyegukanwe na Yassine Bounou ufatira Al Hilal yo muri Saudi Arabia ndetse n'ikipe y'igihugu ya Marocco. Igihembo cy'umuzamu w'umwaka mu bagore cyegukanwe na Chiamaka Nnadozie ukomoka muri Nigeria.
Umutoza w'umwaka muri ibi bihembo cyegukanwe na Bubista utoza ikipe y'igihugu ya Cape Verde. Uyu mutoza yafashije iyi kipe y'igihugu kubona itike yo gukina igikombe cy'Isi bwa mbere mu mateka yacyo.
Benshi bari bategereje kureba abaraza gutwara igihembo cy'umukinnyi mwiza w'umwaka mu bagabo ndetse n'abagore. Mu bagore iki gihembo cyegukanwe na Ghizlane Chebbak ukomoka muri Nigeria.
Mu bagabo iki gihembo cyegukanwe na Ashraf Hakim ukina muri Paris Saint-Germain ndetse n'ikipe y'igihugu ya Marocco. Uyu musore yahesheje PSG UEFA Champions League ya mbere, Shampiyona y'u Bufaransa ndetse n'igikombe cy'igihugu.
Umwaka ushize wa 2024, Ademala Lookman niwe wegukanye iki gihembo. Iki gihe Ashraf Hakim yari yabaye uwa kabiri akomerezaho mu kwitwara neza none uyu mwaka niwe ubaye umukinnyi w'umwaka w'umunyafurika.
Tags:
