Ku gicamunsi cyo kuri uyu wa mbere , Nyakubahwa Mufti w’u Rwanda, Sheikh Sindayigaya Musa, yakiriye Minisitiri w’Ibikorwa bya Kiyisilamu muri Qatar, Nyakubahwa Ghanem bin Shaheen bin Ghanem Al Ghanim, watangiye uruzinduko rw’akazi rugamije gushimangira umubano mwiza n’ubufatanye hagati y’umuryango w'abayisilamu mu Rwanda na Qatar.

Uruzinduko rwa Minisitiri Ghanem bin Shaheen bin Ghanem Al Ghanim ruzamara iminsi itatu rwatangiye kuri uyu munsi, rukaba rugizwe n’uruhererekane rw’ibiganiro biteganyijwe guhuza ubuyobozi bw'abayisilamu mu Rwanda  (RMC) n’itsinda ryaturutse muri Qatar. 

Biteganyijwe ko muri uru ruzinduko, Minisitiri Al Ghanim azasura ibikorwa bitandukanye birimo ahazubakwa icyicaro cy'abayisilamu mu Rwanda ( Waqf ), azasura kandi Ikigo cy'igisha amasomo y'idini y'Islam mu Rwanda cyizwi nka Al-Hidaya Islamic Institute gifashwa kandi cyikayoborwa  n’Umuryango w’Abayisilamu mu Rwanda, azasura kandi ahiganje abayisilamu mu mujyi wa kigali,Inyamirambo, biteganyijwe ko azifatanya n'abayisilamu mu isengesho rya kumanywa rya Adhuhur ku musigiti wa Al -fath nyuma akazasoza urugendo rwe aganira n'abahagarariye umuryango w'abayisilamu mu Rwanda (RMC) aho bazamugaragariza imishinga minini iteganyijwe gukorwa n'uyu muryango.

Uru ruzinduko rufatwa nk’uruje gufungura imikoranire mishya hagati ya RMC na Leta ya Qatar, aho impande zombi zizaganira ku bufutanye n'iterambere.
Qatar isanzwe ifitanye imikoranire myiza na Leta y’u Rwanda, dore ko Amir wa Qatar Sheikh Tamim bin Hamad Al Thani aherutse gusura u Rwanda .Ku bw’iyo mpamvu,
Abayisilamu bo mu Rwanda biteze ko uru ruzinduko rwa Nyakubahwa Ghanem bin Shaheen bin Ghanem Al Ghanim ruzasiga rufunguye amarembo mashya y’ubufatanye hagati y'abayisilamu bo mu Rwanda na Leta ya Qatar, dore ko iki gihugu ari kimwe mu bihugu bya Islam bikunze kumvikana mu gutera inkunga imishinga y’iterambere ishingiye ku ndangagaciro za Islam.