Mu gutangira inteko rusange isanzwe, Umunyamabanga wa FERWAFA, Bonnie Mugabe, yatangiye areba niba abanyamuryango bose bahari kugira ngo harebwe niba abagomba kuza kugira ngo inteko iterane bose bahari basanga ingano ikenewe bose barahari. Abanyamauryango batigeze bagaragara muri iyi nteko rusange bagera kuri barindwi barimo The Winners FC, Interforce, Gorilla FC ndetse n’abandi.

Mu nteko rusange hemerejwemo ko hashyirwaho abantu batatu bazajya basinya ku myanzuro y’inama. Abanyamuryango bose babyemeye ndetse hashyirwaho abantu batatu barimo umuyobozi wa Gicumbi FC, AS Kigali ndetse n’umuyobozi wa Gakenke WFC. Aba baziyongeraho umuyobozi uzajya aba yayoboye inama ndetse na SG wa FERWAFA bakaba abantu batanu.

Mbere yo gukomeza izindi gahunda haje kwemezwa Komiseri mushya ushinzwe imisifurire nyuma y’amezi ane Hakizimana Louis akora izi nshingano ariko ataremezwa nk’umuyobozi w’iyi komisiyo.

Hakizimana Louis, yaje kwemeza ariko mbere yo kwemezwa nka Komiseri ushinzwe imisifurire, yatangaje ko ibintu yabihinduye byongera kugenda neza ndetse ko nyuma yo gutorwa azakomeza kubikora neza. 

Yagize ati “ Twatangiye amavugurura, kandi murabona ko hari kinini cyahindutse. Turimo kuzamura abana bakiri bato, rero mungiriye ikizere imisifurire izakomeza kugenda neza.”

Muri iyi nteko rusange kandi haje kwemezwa ko ikipe ya Kirehe FC ikuwe mu banyamuryango ba FERWAFA kubera kumara igihe nta muntu wayo witabira inteko rusange bijyanye n’igihe bamaze badakina amarushanwa ya FERWAFA.

Shema Ngoga Fabrice yamurikiye kandi abanyamuryango ibyakozwe muri iki gihe gito amaze kubuyobozi ndetse n’ibirimo guteganywa gukorwa. Uyu muyobozi wa FERWAFA atangaza ko hashyizwe imbaraga ku makipe y’abato ndetse ko umuyobozi wa FIFA, Gianni Infantino ubwo aheruka aha mu Rwanda muri gahunda ya FIFA Football Festival, yemereye u Rwanda ibibuga 20.

Haje gutangwa igitekerezo cy’uko FERWAFA yashaka uko iganiriza abafite ibibuga kugira ngo borohereze abafite amarerero y’abato kuko usanga bimwe biba byafashwe na benshi ndetse n’ahandi ugasanga bihenze cyane.

Shema Fabrice yatangaje ko hagomba gushakwa abashoramari bigenga bagafasha mu kubaka ibibuga ariko n’abafite amarerero abasaba gushaka ibigo by’amashuri runaka byabatiza ibibuga mu gihe ibyo FERWAFA irimo gutegura bitarasozwa neza.

Yagize ati “ Tugomba kwishakamo ibisubizo. Turimo gushaka abashoramari bigenga ariko n’abafite amarerero bagashaka ibigo by’amashuri byabatiza ibibuga mu gihe ibya gahunda ya FIFA Forward bitarasozwa neza."

Abanyamuryango bari muri iyi nteko rusange bamurikiwe imara y’umwaka ushize uko yakoreshejwe ndetse n’uko azakoreshwa muri uyu mwaka wa 2026.

Komiseri ushinzwe imari muri FERWAFA, Nshuti Thierry, yatangaje ko mu mafaranga bari bategereje kubona umwaka ushize babonye nibura 51% kuyo bagombaga kubona. Muri Milliyari 15,015,168,801 yagombaga kuboneka habonetse Milliyari 7,644,424,207. Uyu muyobozi yatangaje ko ayo bari bategereje atuzuye kubera ko ayo bagombaga guhabwa na FIFA atabonetse, ndetse nayo Minisiteri ya Siporo yagombaga kubaha itayabahaye.

Nshuti Thierry yamurikiye abanyamuryango ingengo y’impari y’uyu mwaka wa 2026, atangaza ko FERWAFA izakoresha amafaranga angana na Milliyari 14, 627,652,743. Aya mafaranga aho azava harimo ayo Minisiteri ya Siporo izabaha angana na Milliyari 6,176,952,743. Andi mafaranga biteganyijwe ko FERWAFA izayakura mu bafatanyabikorwa, ay’azatangwa yo gushyirwa muri Bayern Academy n’amafaranga azinjira avuye mu bibuga 10 bizubakwa muri Gahunda ya FIFA Forward hamwe n'ibindi.

Nyuma yo kumurikirwa iyi ngengo y’Imara, abayobozi batandukanye batanze ibitekerezo bitandukanye bijyanye n’ibyo babwiwe ariko bamwe bahuriza ku kuntu izi Milliyari zirenga 14 zizaboneka.

Umuyobozi wa Rayon Sports, Murenzi Abdallah yasabye FERWAFA ko hahindurwa uburyo umupira w’u Rwanda ucuruzwa cyane mu itangazamakuru kuko abona atari byiza ahubwo usanga 80% uvugwa nabi, asaba ko hagira igikorwa kugira ngo uvugwe neza ari nacyo abona kizatuma n’abafana baza ari benshi kuri Sitade.

Yagize ati “ Umwaka ushize hari aho urebye ukabona hari ibyo tugomba gukosora. Nibyo amakipe, agomba kwiyubaka ariko abafatanyabikorwa nabo babigiramo uruhare rukomeye. Bashobora kubyuka kuva mu gitondo kugeza nimugoroba amasaha 12 bavuga umupira, bawuvuze neza warebwa. Urebye neza mu kwinjira ku bibuga, kimwe mu byatumye bigabanyuka ni amakuru abafana bahabwa, ushobora gusanga 80% umupira bawuvuga nabi. Abafatanyabikorwa bakinjizwa mu mupira mu buryo bwiza, ahamya ko byatanga umusaruro.”

Umuyobozi wa FERWAFA, Shema Ngoga Fabrice yemeye ko iki gitekerezo n’ubundi barimo kugitegura neza ndetse ko hari no gutegurwa amahugurwa kugira ngo icyiyemejwe kigende neza.

Inteko Rusange ya FERWAFA kandi yagarutse ku mategeko agenga umupira w’amaguru hano mu Rwanda. Komiseri ushinzwe amategeko muri FERWAFA, yatangaje ko ubwo iyi ngoma ya Shema Fabrice izaba irangije umwaka, biyemeje ko hazaba hamaze kuvugururwa amategeko yose agenda umupira kandi ari mu ndimi zombi. Ikindi kifuzwa ni uko bagiye gushyiraho Sisiteme ku buryo uzajya ahabwa ibihano runaka azajya ajyaho akabibona nta wundi muntu biciyeho.    

Inama yasojwe ku isaha ya saa Munani, isozwa na perezida nyuma yaho abanyamuryango basomewe imyanzuro yose yemejwe n’abanyamuryango bari muri iyi nteko rusange.