Abafashwe bafatiwe mu Kagali ka Nyakerera, Umudugudu wa Gasenyi, ku wa 14 Mata 2026, bafatanywe litiro 20 za Kanyanga bari bagiye kujyana gucuruza.

‎Nk’uko byemejwe na SSP Twizeyimana Hamdun, Umuvugizi wa Polisi mu Ntara y’Iburasirazuba, yavuze ko abafashwe bari bafite iyi nzoga itemewe mu buryo bw’amategeko bayijyanye kuyicuruza.

‎Yagize ati “Abafashwe bafatanywe litiro 20 za Kanyanga bari bagiye gucuruza.”

‎Yakomeje asobanura ko abakora ubu bucuruzi bakoresha amayeri atandukanye mu rwego rwo kuyihisha inzego z’umutekano.

‎Ati “Bakoresha amacupa y’amazi ya litiro imwe n’igice mu kuyitwara kugira ngo bayijijishe.”

‎SSP Twizeyimana kandi yagaragaje ko nyir’iyi Kanyanga atari yafashwe, kuko yari yayisigiye umusore abereye se wabo kugira ngo ayicuruze.

‎Yagize ati “Polisi yasanze nyirayo adahari, bamenya amakuru ko yari yagiye kugura ingurube yo kubaga, ariko kugeza ubu aracyashakishwa.”

‎Yakomeje agaragaza ingaruka z’izi nzoga z’ibiyobyabwenge ku buzima bw’abantu, avuga ko zitera ibibazo birimo amakimbirane mu miryango, urugomo, gukubita no gukomeretsa, n’ibindi byaha.

‎Yanashimiye abaturage ku ruhare bagira mu gutanga amakuru ku gihe, ashimangira ko bifasha inzego z’umutekano kurwanya ibyaha.

‎SSP Twizeyimana yibukije abakomeje ibikorwa nk’ibi kubihagarika bagakora ibijyanye n’amategeko, agaragaza ko Polisi itazihanganira ababangamira umutekano. Yagize ati “Polisi ntizigera ibihanganira.”

‎Mu gihe iperereza rikomeje, abafashwe bose bafungiye kuri sitasiyo ya Polisi ya Kigarama.

‎Muri uwo murenge kandi, kuva tariki 6 Mata kugeza ku wa 14 Mata 2026, hamaze gufatwa litiro zirenga 26 za Kanyanga, hanatabwa muri yombi abantu babiri bayinywaga, bahise bayimena, ubu na bo bakaba bari gukurikiranwa.