Ni umuhango wabimburiwe n'igikorwa cyo gushyira indabo ku Rwibutso rwa Jenoside rwa Kigali, mu rwego rwo kunamira no guha icyubahiro Abatutsi bahashyinguye.

Nyuma haje gutangwa ibiganiro bitandukanye by'uko jenoside yakorewe abatutsi mu 1994 yateguwe ikanashyirwa mu bikorwa no gushishikariza kurwanya ingengabitekerezo yayo ndetse hanatangwa n'ubuhamya bw'uwayirokotse.

Umunyamabanga Nshingwabikorwa w’Umurenge wa Kimisagara, Ufiteyezu Damascene, yihanganishije imiryango y’abacitse ku icumu rya Jenoside, ashimangira ko Jenoside itari gushoboka iyo hatabaho ubuyobozi bubi bwariho icyo gihe anagaragaza ko ari inshingano za buri wese guharanira ko ayo mateka mabi atazongera kubaho.

Madamu Uwamahoro Jenevieve we yagaragaje ko nubwo amateka ya Jenoside muri Kimisagara agaragaza ubugwari n’ubugome bukomeye bwari bushyigikiwe n’abari abayobozi, kuri ubu hari icyizere cy’ejo hazaza heza. 

Yasabye abaturage gukomeza kubaka u Rwanda ruzira amacakubiri, barangwa n’urukundo, ubumwe no guharanira iterambere rirambye, mu gusigasira amateka no guha agaciro ubuzima bw’abarokotse.