Kinyarwanda
English
Swahili
&format=webp)
&format=webp)
Burkina Faso yongeye kwibasirwa n’ibitero by’umutwe wa JNIM ukorana bya hafi n’uwa Al-Qaeda
Igihugu cya Burkina Faso cyongeye kwibasirwa n’ibitero bikomeye by’imitwe yitwaje intwaro ikorana bya hafi na Al-Qaeda aho aba civile barenga 38 bishwe mu kwezi kumwe mu gihe abagore barenga icyenda bashimuswe.
Ni ibyatangajwe n’umuryango mpuzamahanga uharanira uburenganzira bwa muntu wa Human Rights Watch wavuze ko ibyo bitero byahitanye abo bantu barenga 38 byabaye hagati ya tariki ya 29 Mutarama na 22 Gashyantare 2026.
Uyu muryango uharanira uburenganzira bwa muntu wa Human Rights Watch uvuga ko abakekwa kugaba ibyo bitero ari umutwe wa JNIM usanzwe ukorana bya hafi n’umutwe w’iterabwoba wa Al-Qaeda ukomeje kongera ibirindiro byawo mu karere ka Sahel.
Raporo ya Human Rights Watch ivuga ko iyo mitwe y’iterabwoba yagabye igitero cya mbere hafi y’umudugudu wa Solle uherereye mu majyaruguru ya Burkina Faso aho abo barwanyi banashimutiye abagore icyenda bakabajyana kubakoresha imibonano mpuzabitsina ku gahato.
Umutwe wa JNIM wongeye kugaba ibitero ku wa 14 Gashyantare 2026 ubigabye ku kigo cy’igisirikare kiri mu mujyi wa Titao. Igitero cyahitanye abacivile barenga 34 ndetse n’inzu zabo icyo gihe ziratwikwa.
Ku wa 22 Gashyantare uwo mutwe wongeye kugaba igitero mu mujyi wa Manni uherereye mu burasirazuba bwa Burkina Faso. Igitero cyahitanye abacuruzi bane ndetse n’inzu z’ubucuruzi nyinshi icyo gihe zirasahurwa.
Kugeza ubu imitwe yitwaje intwaro muri icyo gihugu cya Burkina Faso ikomeje kwagura ibirindiro byayo ndetse n’imirwano ingabo z’icyo gihugu zihanganiyemo nayo ikomeje gufata indi ntera. Iyi mirwano ikaba yaratangiye mu 2015.
