Uyu muganda wabaye ku Cyweri tariki ya 1 Werurwe 2026, ukorerwa mu kigo cyita ku bana bafite ubumuga, ku bufanye n’Imiryango ya Mustered Seed.

Ni Umuganda wakozwe ku bufatanye n’Ibitaro bya Kaminuza ya West Indies, ishami rya Tony Thwaites, hagamijwe kunoza imibereho n’imyigire by’abana bo ku Kigo cya Blessed Assurance. Mu mirimo yakozwe harimo gusiga irangi inzu y’ishuri no gushyira ibikoresho bitanga umuyaga mu byumba byo kuraramo.

Uyu muganda uri mu bikorwa bikomeje byo gufasha gusana no kuzahura ibyangijwe n’inkubi y’umuyaga yiswe Melissa, hagamijwe gufasha abaturage bugarijwe n’ibibazo no gusubiza ku murongo ibikorwaremezo by’ingenzi.

Uyu muganda unagaragaza umwuka w’ubufatanye hagati ya RDF na JDF, ndetse n’ubushake bahuriyeho mu kubaka ubushobozi bw’abaturage no gutanga ubufasha bw’ubutabazi.

Umuyobozi w’Itsinda ry’Abahanga mu by’ubwubatsi rya RDF, Col Moses Kayigamba, yashimiye abitabiriye bose ubwitange no gukorera hamwe bibaranga.

Yasobanuriye abari aho inkomoko y’Umuganda, wemejwe mu Rwanda hagamijwe guteza imbere ubumwe, ubufatanye n’inshingano rusange.

Yagaragaje ko Umuganda ukorwa nk’itegeko ku wa Gatandatu wa nyuma wa buri kwezi, ndetse ashimangira ko kujyana uyu muco wo kwitangira abandi muri Jamaica bikomeza gushimangira umubano n’ubunararibonye bahuriyeho, bigirira akamaro abaturage bakorera.

Umuyobozi w’Ikigo cya Blessed Assurance Children’s Home, Dalmas Agan, we yashimiye byimazeyo itsinda ry’abahanga mu by’ubwubatsi ba RDF na JDF ku bufasha budasanzwe batanze.

Yashimye umutima mwiza n’umurava by’aya matsinda, avuga ko abana bagiye kubaho no kwiga mu buryo bwiza kurushaho kubera iki gikorwa cyuje umutima w’urukundo.

Yavuze ko iki gikorwa ari ikimenyetso nyacyo cy’impuhwe n’ubufatanye, kandi ko cyagize uruhare rugaragara mu guhindura ubuzima bw’abana barererwa muri iki kigo.