Uyu rutahizamu w’imyaka 41 wa Al-Nassr FC, yaguze iyo migabane abinyujije muri sosiyete ye ijyanye n'ibikorwa bya siporo yitwa CR7 Sports Investments. UD Almería isanzwe ari iy’itsinda ry’abashoramari bo muri Saudi Arabia riyobowe na Mohammed Al-Khereiji.

Nubwo amafaranga yakoreshejwe atatangajwe, Ronaldo yavuze ko atewe ishema no gukorana n’ubuyobozi bw’iyi kipe mu gushyigikira icyiciro gikurikira cy’iterambere ryayo. Yongeyeho ko yari amaze igihe yifuza gutanga umusanzu mu mupira w’amaguru atari mu kibuga gusa.

Perezida wa Almería, Al-Khereiji, yavuze ko Ronaldo afatwa nk’umukinnyi ukomeye kurusha abandi bose babayeho, kandi ko azi neza shampiyona zo muri Espagne ndetse n’ubushobozi bw’umushinga w’iyi kipe haba ku ruhande rw’ikipe nkuru no ku ishuri ryigisha umupira (academy).

Mu mwaka ushize, SMC Group ya Al-Khereiji yaguze Almería iyikuye kuri Turki Al-Sheikh, uyobora Ikigo rusange gishinzwe imyidagaduro (GEA) cya Leta ya Saudi Arabia.

Ronaldo yamaze imyaka icyenda akinira Real Madrid FC, aho yatwaye ibikombe bibiri bya La Liga ndetse anegukana Champions League inshuro enye mbere yo kwerekeza muri Juventus FC mu mwaka wa 2018.

Kuva muri 2022 akinira Al-Nassr ikina shampiyona ya Saudi Pro League, kandi ni we mukinnyi uhembwa amafaranga menshi kurusha abandi bose mu mateka y’umupira w’amaguru, aho ahembwa miliyoni 177 z’ama-pound ku mwaka.

UD Almería yashinzwe mu 1989, kuri ubu iri ku mwanya wa gatatu muri Segunda División, irushwa amanota abiri gusa n’ikipe ya mbere, mu gihe hasigaye imikino 15 ngo shampiyona irangire.