Amakuru yacu y'imikino reka tuyahere hano mu Rwanda Hano mu Rwanda 

Gatandatu tariki 26 Nyakanga 2025, nibwo Iserukiramuco rya Giant of Africa, ryatangiye hakorwa Umuganda. Ni Umuganda wakozwe na Giant of Africa ifatanyije na Imbuto Foundation ndetse na Minisiteri i y'urubyiruko n'ubuhanzi.

Ku cyumweru kandi hakozwe ubukangurambaga bwateguwe na Giant of Africa bwitabirwa n'abakobwa bakiri bato bagera kuri 50. N'ubukangurambaga bwabereye mu karere ka Huye, banahugurwa ku bijyanye n'umukino wa Basketball. 

Ibi birori byahise bifungurwa ku mugaragaro muri BK Arena. Byitabiriwe n'abarimo Perezida Paul Kagame, Minisitiri w'urubyiruko, Minisitiri wa Siporo ndetse na Masai Ujiri watangije Giant Of Africa yabereye mu Rwanda ku nshuro ya Kabiri.

Reka dukomereze mu ikipe y'igihugu y'u Rwanda y'Abagore ya Basketball yitabiriye igikombe cy'Afurika (Afrobasketball) kirimo kubera mu gihugu cya Cote D'Ivoire. Umukino wa mbere u Rwanda rwawukinnye ku wa Gatandatu n'ikipe y'igihugu ya Nigeria urangira ari amanota 92 ya Nigeria kuri 45 y'u Rwanda.

Kuri uyu munsi Kandi ikipe y'igihugu ya Cote D'Ivoire yatsinze Misiri amanota 75 kuri 63. Undi mukino wabaye ni uwahuje Senegal na Guinea urangira Senegal itsinze amanota 92 kuri 48. Ikipe y'igihugu ya Afurika y'epfo yakinnye umukino wa mbere na Mali urangira itsinzwe amanota 55 kuri 53.

Ku cyumweru iyi mikino yarakomeje aho ikipe y'igihugu y'u Rwanda yakinnye umukino wa Kabiri n'ikipe ya Mozambique urangira itsinzwe amanota 72 kuri 55. Indi mikino yakinwe harimo uwarangiye ikipe y'igihugu ya Uganda itsinda Guinea amanota 88 kuri 51, Misiri yatsinze Angola amanota 70 kuri 54.

Kuri iki cyumweru tariki 27 Nyakanga 2025, hasojwe Kandi irushanwa rya Hand Ball ryiswe Coupe De Rwanda ryaberaga mu murenge wa Kimisagara. Umukino wa nyuma wahuje APR HC na Police HC, urangira ikipe ya APR HC itwaye igikombe nyuma yo gutsinda Police HC ibitego 28 kuri 25. 

APR HC yegukanye irushanwa rya Hand Ball 

U Rwanda rwatsinzwe umukino wa Kabiri mu gikombe cy'Afurika cya Basketball 

Amakuru avugwa mu mupira w'amagaru 

Ku wa Gatandatu tariki 26 Nyakanga 2025, Gorilla FC yari yasuye ikipe ya Bugesera FC, umukino urangira ikipe zombi zinganyije 0-0 mu mukino wa gishuti. 

Reka amakuru y'imikino tuyakomereze mu ikipe ya Rayon Sports, yakinnye umukino wa gishuti ku cyumweru tariki 27 Nyakanga 2025 na AS Muhanga. Ni umukino wabereye kuri sitade mpuzamahanga y'Akarere ka Muhanga, uza kurangira Rayon Sports itsinze ibitego 4-0.

Abakinnyi batsindiye Rayon Sports ni Adama Bagayogo watsinze icya mbere, Harerimana Abdalaziz uzwi nka Rivaldo atsinda icya kabiri, Asana Nah Innocent atsinda igitego cya gatatu ndetse na Rukundo Abdourhman waje atsinda igitego cya Kane.

Ikipe ya Police FC nayo Kandi yakinnye umukino wa gishuti n'ikipe ya Marine FC mu karere ka Rubavu aho irimo kwitegurira shampiyona. Uyu mukino waje kurangira Police FC itsinze Marine FC ibitego 2-0. Ni ibitego byatsinzwe na Kwitonda Alain Bacca ndetse na Byiringiro Lague.

Ikipe ya Musanze FC nayo yakinnye umukino wa gishuti na Rutsiro FC, urangira ikipe zombi zigiye miswi ku bitego 2-2.

Amakuru avugwa hano mu Rwanda reka tuyakomereze muri APR FC iri mu gahinda bafatanyije n'umukinnyi wabo w'Umugande, Ronald Ssekiganda wapfushije mama we umubyara. Uyu mubyeyi wa Ronald Ssekiganda yitabye Imana ku wa Gatandatu tariki 26 Nyakanga 2025.

Umunyarwanda ukina muri Sudani y'epfo, Muhire Kevin na bagenzi be bakinana muri Jamus SC bakomeje kwitegurira shampiyona mu gihugu cya Tanzania mu mujyi wa Dar Saalam. Iyi kipe imaze igihe gito muri iki gihugu nyuma yo kuva muri Sudani y'epfo aho isanzwe ibarizwa.

Rayon Sports yatsinze AS Muhanga mu mukino wa gishuti 

Ronald Ssekiganda yapfujije umubyeyi we

Amakuru avugwa muri Afurika

Igihugu cya Tanzania cyamaze gutegura neza uko kizakira ibirori bifungura igikombe cy'Afurika cy'abakina imbere mu gihugu kizakinirwa mu bihugu bitatu birimo Tanzania, Uganda ndetse na Kenya, guhera tariki 2 Kanama 2025.

Reka tugume Kandi muri Tanzania, aho SIMBA SC igeze kure ibiganiro na Feisal Fei Toto utifuza kuguma muri Azam FC. Uyu mukinnyi ku wa Gatandatu tariki 25 Nyakanga 2025, yemereye SIMBA SC kuyerekezamo mu gihe baba bumvikanye na Azam FC.

Umunyarwandakazi wakinaga muri Rayon Sports, Usanase Zawadi yamaze kwerekeza muri Tanzania muri SIMBA Queens SC. Ni umukinnyi werekeje muri Tanzania asanzeyo Mukandayisenga Jeanine ukina muri Yanga Princess kuva umwaka ushize.

ES Setif yamaze gusinyisha umukinnyi w'umunya-Ghana witwa Mudasiru Salifu w'imyaka 28 wakinaga muri Uzbek side FC Mash’al Mubarek. Iyi kipe niyo Biramahire Abeddy aheruka kwerekezamo nyuma yo kuva muri Rayon Sports.

Ikipe y'igihugu ya Nigeria y'Abagore yegukanye igikombe cya Afurika itsinze ikipe y'igihugu ya Marocco ibitego 3-2. Ni umukino wabaye tariki 26 Nyakanga 2025. Uyu wari umukino wa nyuma wahuje aya makipe yombi, Nigeria itwara igikombe ku nshuro ya 10 kuva cyatangira gukinwa.

Mu gihugu cya Afurika y'epfo, ku wa Gatandatu tariki 26 Nyakanga 2025, hakinwaga umukino wa nyuma wa Toyota Cup wahuje Kaizar Chiefs na Asante Kotoko. Uyu mukino warangiye Asante Kotoko itwaye igikombe nyuma yo gutsindira Kaizar Chiefs kuri Penalite 3-2. Umunyarwanda Ntwari Fiacre ntabwo yakinnye ndetse nta nubwo yari mu bakinnyi 18 Kaizar Chiefs yifashishije.

Umunyarwanda, Mugisha Bonheur yafashije ikipe ye ya Stade Tunisien kugera ku mukino wa nyuma wa Tunisia Super Cup. Bonheur muri uyu mukino wa 1/2 Stade Tunisien yakinnye na US Monastri kuri iki cyumweru, yatsinze igitego cya mbere muri 2-0 ikipe ye yatsinze. Iyi ntsinzi yatumye bagera ku mukino wa nyuma bazahuramo na Esperance De Tunis.

Mugisha Bonheur yafashije Stade Tunisien kugera ku mukino wa nyuma 

Ku mugabane w'i Burayi n'ahandi ku isi

Ku wa gatandatu tariki 26 Nyakanga 2025, hakinwe imikino ya gishuti ndetse iza no gukomeza ku cyumweru tariki 27 Nyakanga 2025.

Imwe mu mikino yari ihanzwe amaso harimo uwahuje FC Barcelona na Vissel Kobe urangira ikipe ya FC Barcelona ibonye intsinzi y'ibitego 3-1. Uyu mukino rutahizamu Marcus Rashford yahawe iminota 30 yo gukina nyuma yo gusinya umwaka umwe nk'intizanyo avuye muri Manchester United.

Arsenal FC yerekanye Viktor Gyokores nyuma yo gukora ikizamini cy'ubuzima ku wa Gatanu tariki 25 Nyakanga 2025. Uyu mukinnyi yatangajwe ku mugaragaro aho iyi kipe irimo gukorera Pre-Season muri Singapore.

Kuri iki cyumweru tariki 27 Nyakanga 2025, iyi kipe Kandi yakinnye umukino wa gishuti n'ikipe ya Newcastle United umukino urangira Arsenal FC itsinze ibitego 3-2, abarimo Martin Ødegaard na Merino bigaragaza cyane.

Manchester United kandi nayo yakinnye umukino wa gishuti na West Ham United. Ni umukino warangiye ikipe ya Manchester United ibonye intsinzi y'ibitego 2-1. Ibitego byose bya Man U byatsinzwe na Bruno Fernandes, naho West Ham United yatsindiwe na Jareod Bowen.

Mu Ijoro ryacyeye Kandi habaye umukino wa nyuma wa Euro y'Abagore wahuje ikipe y'igihugu y'Ubwongereza n'iya Esipanye. Ni umukino warangiye Ubwongereza butwaye igikombe nyuma yo gutsinda Esipanye kuri Penalite 3-1. Iminota 90 yarangiye ikipe zombi zinganyije igitego 1-1.

Ku cyumweru Kandi hasojwe Tour De France. Ni irushanwa ryegukanwe na Tadej Bogacar. Uyu munya-Slovenian yegukanye Tour De France ku nshuro ya 4. Uyu musore w'imyaka 23 ukina muri UAE Team Emirates, umwaka ushize yari yasoje ari ku mwanya wa kabiri none uyu mwaka ahise ayegukana.

Andi makuru arimo kugenda avugwa

Ikipe ya Chelsea FC yamaze kugurisha rutahizamu wayo, Joao Felix muri Saudi Arabia muri Al-Nassri. Uyu mukinnyi asanzwe Cristiano Ronaldo bakomoka mu gihugu kimwe. Joao Felix aratangwaho Million 44 z'Amayero.

Liverpool FC ikomeje gukomera kuri rutahizamu wayo Louis Diaz urimo gushaka cyane kwerekeza muri Bayern Munich. Amakuru ahari aravuga ko ibiganiro bikomeje hagati y'impande zombi ndetse Bayern Munich yemeye gutanga Million 75 z'amayero ariko ntabwo Liverpool FC irafata umwanzuro. Gusa biravugwa ko uyu musore vuba arakora ikizamini cy'ubuzima agahita asinya imyaka 4 muri iyi kipe yo mu Budage.

Morgan Gibbs-White w'imyaka 24, washakwaga n'amakipe amwe akomeye mu gihugu cy'Ubwongereza, yongereye amasezerano y'imyaka 3 nk'umukinnyi wa Nottingham Forest. Uyu musore yabaye muri iyi kipe kuva mu mwaka wa 2022.

Amakuru yacu y'imikino reka tuyasoreze kuri Alexander Isak wamenyeshije Newcastle United ko ashaka kuyisohokamo nyuma yo kwerekwa na Liverpool FC ko imwifuza cyane. Liverpool FC ikomeje ibiganiro na Newcastle United kugirango barebe aho bahuriza, uyu musore akiyongera kuri Florian Wirtz, Jeremie Fripong ndetse na Hugo Ekitike baheruka gusinyira iyi kipe.

Marcus Rashford yakinnye umukino wa mbere muri FC Barcelona 

Tadej Bogacar yegukanye irushanwa rya Tour De France