Kinyarwanda
English
Swahili
![Arsenal FC yifatanyije n’u Rwanda muri ibi bihe byo kwibuka Jenoside yakorewe abatutsi mu 1994 [AMASHUSHO]](https://ukwelitimes.com/uploads/images/202604/image_430x256_69d4cdfe23b3a.jpg)
Igikorwa cyo kwibuka kizabera muri Uganda cyatangiriye kuri Nyabarongo
Mu kwitegura igikorwa cyo kwibuka abazize Jenoside yakorewe Abatutsi bashyinguye mu gihugu cya Uganda kizaba tariki 10 Mata 2026, kuri uyu wa gatatu tariki 08 Mata 2026, Abagize Umuryango Humura Victoria warakoze bashyize indabo ku rwibutso rwa Nyabarongo mu mujyi wa Kigali ahazwi nko kuri Ruliba.
Impamvu yo gutangirira iki gikorwa aha kuri Nyabarongo, ni mu rwego rwo gusubiza agaciro abishwe bakajunguywa mu migezi yo mu Rwanda amazi akabatembana abajyana mu kiyaga cya Victoria mu gihugu cya Uganda baciye mu mugezi w’Akagera, ari naho hari inzibutso 3 bashyinguyemo.
Igikorwa cyo kwibuka mu gihugu cya Uganda kiba buri mwaka kikaba gitegurwa n’umuryango w’abarokotse jenoside yakorewe Abatutsi mu Rwanda mu 1994 witwa Humura Victoria Warakoze ku bufatanye na leta y’u Rwanda binyuze muri MINUBUMWE na Ambasade y’u Rwanda mu gihugu cya Uganda.
Kuri iyi nshuro yo kwibuka ku nshuro ya 32 Jenoside yakorewe Abatutsi mu Rwanda mu 1994, igikorwa kizaba ku itariki 10 Mata 2026 ku rwibutso rwa Ggolo ruherereye mu karere ka Mpigi ahashyinguye imibiri 4,771 akaba ari rumwe mu nzibutso 3 ziri aha mu gihugu cya Uganda.
Rutayisire Dieudonne Visi perezida wa Humura Victoria warakoze Association yabwiye UKWELI TIMES ko ubutumwa bajyanye mu gihugu cya Uganda arukubwira amahanga ko Jenoside atari nziza ikwiye gukumirwa aho ariho hose ku Isi.
Yagize ati “Ubutumwa tujyanye hariya nukubabwira ko Jenoside ari ikintu kibi idakwiye kugira ahandi iba aho ariho hose ku isi”.
Rutayisire kandi avuga ko basaba abanyarwanda muri rusange kwirinda ingengabitekerezo ya jenoside aho iva ikagera agasaba urubyiruko guhangana n’birirwa bapfobya bakanahakana Jenoside yakorewe Abatutsi mu Rwanda mu 1994.
Muri rusange, muri Uganda hashyinguye Abatutsi bazize Jenoside 10, 983 mu nzibutso 3 arizo urwa Ggolo ruri mu karere ka Mpigi rushyinguyemo 4,771, urwa Lambu mu karere ka Masaka rushyinguyemo Abatutsi 3,337 n'urwa Kasensero mu karere ka Rakai rushyinguwemo Abatutsi 2,875.
