Kinyarwanda
English
Swahili
Gabiro Guitar yatsinze urubanza rw'ubujurire yaregwagamo arenga miliyoni 10Rwf
Umuhanzi Gabiro Guitar yongeye gutsinda mu bujurire kompani ya Evolve Music Group Ltd bakoranye yamwishyuzaga arenga miliyoni 10Rwf.
Kuri uyu wa 30 Mata 2025, Urukiko Rukuru rw'Ubucuruzi, twatesheje agaciro ubujurire bwa Evolve Music Group Ltd mu kirego barezemo Gabiro Guitar.
Muri kopi y'urubanza Ukweli Times ifitiye kopi, Urukiko rwanzuye ko iyi kompanyi igomba kwishyura Gabiro amafaranga 300.000Rwf nk'igihembo cya Avoka.
Aya mafaranga aza yiyongera ku yandi 100.000Rwf y'ikurikiranarubanza, n'ayandi 500.000Rwf nk'igihembo cya Avoka nk'uko byemejwe mu rwego rwa mbere.
Urukiko kandi rwanzuye ko imikirize y'urubanza rwaciwe tariki ya 15 Ukwakira 2024 n'Urukiko rw'Ubucuruzi idahindutse.
Evolve Music Group Ltd yakoranye na Gabiro The Guitar yari yamuregeye Urukiko rw’ubucuruzi imusaba kuyishyura arenga miliyoni 10 Frw yavugaga ko ayirimo nk’umwenda.
Ni ikirego cyatangiye muri Mutarama 2024, ubwo Gabiro The Guitar yari amaze gutandukana n’iyi sosiyete, bakamwishyuza miliyoni 5Frw nk’imari shingiro yari yiyemeje gutanga mu kuyishinga afatanyije n’uwitwa Muhaturukundo Gilbert.
Iyi sosiyete yashinzwe mu 2021 yavugaga ko uyu muhanzi atigeze atanga imari shingiro ye bituma imikorere yayo igenda nabi kugeza ubwo yayisohotsemo mu 2022.
Ibi byatumaga bamwishyuza imari shingiro ingana na miliyoni 5Frw, igice cy’ideni ry’imisoro ya miliyoni 2Frw iki kigo cyarimo Ikigo cy’Igihugu cy’Imisoro n’Amahoro ndetse n’arenga miliyoni 5Frw bavugaga ko bamushoyemo mu bikorwa by’umuziki we.
Mu rubanza rwabanje, Urukiko rwemeje ko nta mwenda uyu muhanzi abereyemo Evolve Music Group Ltd, ibyo batishimiye barajurira ariko birangiye batsinzwe.
