Mu ijoro ryo ku wa mbere tariki 8 Ukuboza 2025, nibwo ishyirahamwe ry'umupira w'amagaru hano mu Rwanda FERWAFA, ryatangaje ko Super Cup izahuza Rayon Sports na APR FC izaba ku itariki 10 Mutarama 2026.

Ni umukino uzaba utoroshye nubwo uwuheruka guhuza aya makipe yombi warangiye ikipe ya APR FC inyagiye Rayon Sports ibitego 3-0 mu mukino wa Shampiyona.

Uyu mukino wari utegerejwe na benshi kuko mu biganiro bya Siporo akenshi abakunzi b'aya makipe yombi bakundaga kubaza igihe uyu mukino uzabera ariko birangiye ushyizwe mu mwaka utaha wa 2026.

Ubusanzwe Super Cup niyo itangira Shampiyona y'u Rwanda ariko muri iyi Saison ya 2025-2026, byahuriranye n'imikino y'ikipe y'igihugu y'u Rwanda Amavubi yari irimo gushaka itike yo gukina igikombe cy'Isi ndetse n'imikino ya CECAFA Kagame Cup yitabiriwe na APR FC bituma udakinwa kugeza Shampiyona itangiye.

Umukino wa Super Cup uhuza ikipe yatwaye igikombe cya Shampiyona ndetse n'iyatwaye igikombe cy'Amahoro ariko ibi bikombe byose umwaka ushize byatwawe na APR FC, hafatwa Rayon Sports kuko ari yo yageze ku mukino wa nyuma w'igikombe cy'Amahoro.

Umukino wa Super Cup uheruka wahuje APR FC yatwaye Shampiyona ndetse na Police FC yari yatwaye igikombe cy'Amahoro urangira Police FC ari yo yegukanye iki gikombe kuri Penalite 6-5 nyuma yo kunganya ubusa ku busa.

Kuri iyi tariki kandi ni nabwo ikipe ya Rayon Sports WFC izakina n'Indahangarwa WFC muri Super Cup y'Abari n'abategarugori.