Ni umukino wabaye mu ijoro ryo ku cyumweru tariki 11 Mutarama 2026, aho ikipe ya Real Madrid yaje kugerageza kwitwara neza ariko isanga FC Barcelona ari nziza kuyirusha. 

Umukino watangiye ikipe ya FC Barcelona n'ubundi irimo kurusha cyane Real Madrid yaje gukina idafite rutahizamu wayo usanzwe ayitsindira ibitego, Kylian Mbappé wari ku ntebe y'abasimbura nyuma yo kumara igihe afite ikibazo cy'Imvune.

Ikipe ya FC Barcelona yaje kubona igitego cya mbere hakiri kare aho yaje gutsindirwa na Raphinha, Vinicius Jr aza kucyishyura FC Barcelona ishyiramo icya kabiri gitsinzwe na Robert Lewandowski, Real Madrid iza kwishyurirwa na Gonzalo Garcia ariko Raphinha aza guhereza igikombe FC Barcelona nyuma y'igitego cya Gatatu cyiza yatsinze.

Ikipe ya Real Madrid yaje gutangira gushaka uko yabona igitego cya gatatu cyo kwishyura ariko n'ubundi bikomeza kugenda byanga. Habura iminota ine kugira ngo umukino urangire, FC Barcelona yabonye ikarita y'umutuku yahawe Frankie De Jong ariko biba iby'ubusa birangira FC Barcelona ibonye intsinzi y'ibitego 3-2.

Rutahizamu wa FC Barcelona, Raphinha nyuma yo guhesha iyi kipe igikombe yahawe igihembo cy'umukinnyi mwiza w'iyi Super Cup ariko kandi twongeye kubona Ronald Araujo wari umaze igihe nta mukino wa FC Barcelona akina kuko bari barimo kumwitaho mu buryo bw'imitekerereze.

Ku ruhande rwa Real Madrid, yongeye gutakaza umukinnyi wayo ukina hagati mu kibuga Fede Valverde wagize ikibazo cy'imvune agasimburwa na Arda Güler.

Ikipe ya FC Barcelona yisubije iki gikombe cya Super Cup nyuma yaho umwaka ushize wa 2025 nabwo yagitwaye itsinze Real Madrid ibitego 3-2. Mu mikino ya nyuma igera ku munani umutoza wa FC Barcelona, Hansi Flick akinnye ari umutoza ntabwo aratsindwa na rimwe.

FC Barcelona yatwaye igikombe cya Super Cup itsinze Real Madrid 

Lamine Yamal, Robert Lewandowski ndetse na Raphinha bishimira gutwara igikombe