Ku wa mbere tariki 3 Ugushyingo 2025, nibwo Arsenal FC yerekeje mu gihugu cya Repubulika ya Czech aho iraza gukinira umukino na Slavia Plague mu mukino wa Kane wa UEFA Champions League.

Ni umukino Arsenal FC iraza gukina kuri uyu wa Kabiri tariki 4 Ugushyingo 2025, idafite rutahizamu wayo uheruka gutsinda, Viktor Gyökeres kubera ikibazo cy'Imvune yagize mu mukino uheruka wa Shampiyona y'Ubwongereza.

Mu Kiganiro n'itangazamakuru, Umutoza wa Arsenal FC, Mikel Arteta yatangaje ko uyu mukinnyi yagize imvune mu mukino iyi kipe yatsinzemo Burnley ibitego 2-0 ariko kugeza ubu atarasuzumwa kugira ngo bamenye ikibazo cy'Imvune yagize niba gikomeye ndetse n'igihe azamara hanze y'ikibuga.

Yagize ati " Mu buryo busobanutse, ntabwo azaboneka. Ntabwo yitoje uyu munsi, kandi tugomba gukora ibindi bizamini mu minsi mike iri imbere kugira ngo tumenye neza uburemere bw’iyi mvune. Ku mukino w’ejo, ntabwo azaboneka."

Mikel Arteta yatangaje ko iki kintu kimuteye impungenge kuko ntabwo Gyökeres yari asanzwe agira ibi bibazo by'imikaya Kandi iki ni kimwe mu bitorohera abakinnyi nk'aba bakoresha imbaraga nyinshi.

Yagize ati " Mbifitiye impungenge, kuko ntabwo asanzwe agira ibibazo by’imikaya, ariko uyu munsi yagize ikibazo cyatumye asohoka mu kibuga yumva ububabare. Ibi ntabwo ari ikimenyetso cyiza ku mukinnyi ukina yihuta cyane. Turimo gukora iperereza ngo tumenye neza aho ikibazo kiri n’uburemere bwacyo."

Arsenal FC uyu mukino igiye gukina na Slavia Plague ni umukino w'umunsi wa Kane wa UEFA Champions League, mu mukino itatu yose iheruka yarayitsinze, ifite amanota 9 ku 9. Arsenal FC yatsinze Atletico Madrid ibitego 4-0, itsinda Athletic Club ibitego 2-0 ndetse na Olympiacos ibitego 2-0.

Viktor Gyökeres yagize ikibazo cy'Imvune