Mu ijoro ryo ku wa Gatatu tariki 7 Ukwakira 2025, ku isaha ya saa Tatu, Nibwo ku mugabane w'i Burayi hari hakomeje imikino ya UEFA Champions League ariko mu Bagore.

Umukino wari utegerejwe na benshi wari umukino ugomba guhuza FC Barcelona y'Abagore ndetse na FC Bayern Munich yo mu gihugu cy'u Budage. Ni umukino wari ukomeye ariko warangiye FC Barcelona inyagiye Bayern Munich ibitego 7-1.

Abakurukiye uyu mukino baryohewe cyane kuko FC Bayern Munich y'Abagore yatangiye ubona irimo kugerageza kwirwanaha ariko iza kurushwa nyuma na FC Barcelona imaze iminsi isa nk'iyiyoboye ku mugabane w'i Burayi mu Bagore.

Ibitego bya FC Barcelona byatsinzwe na Alexia Putellas ku munota wa 4, Ewa Pajor ku munota wa 12 n'uwa 56, Esmee Brugts ku munota wa 27, Salma Paralluelo ku munota wa 46 ndetse na Clàudia Pina ku munota wa 88 n'uwa 92. Igitego kimwe rukumbi cya Bayern Munich cyatsinzwe na Klara Bühl ku munota wa 32.

Uyu mukino warebwe n'abakunzi benshi b'umupira w'amaguru i Burayi ariko uwagarutsweho cyane ni Raphinha usanzwe akinira FC Barcelona wari waje muri Estadi Johan Cruyff gushyigikira aba Bagore b'iyi kipe akinira.

Indi mikino yakinwe harimo uwahuje Juventus WFC yatsinze Benfica WFC ibitego 2-1, Arsenal WFC yatsinzwe na Lyon WFC ibitego 2-1 hamwe na Paris WFC yanganyije na Oud-Heverlee Leuven WFC ibitego 2-2.

Raphinha yari muri Sitade yaje gukurikirana uyu mukino

FC Barcelona y'Abagore yanyagiye Bayern Munich