Evelyn Mic ni umunyamakuru wa Radiyo Dembe FM ndetse akaba n’umushyushyarugamba, ukomeye muri Uganda. Mic yagaragaje ko mu rwego rwo guha icyubahiro umuryango wa Mayanja ufite abanyabigwi mu muziki wa Uganda, nka Jose Chameleone, Weasel Manizo, na Pallaso, bakitirirwa imihanda itatu muri Kampala.

Abinyujije ku rukuta rwe rwa X (yahoze ari Twitter), Evelyn Mic yagaragaje uburyo ashimira uyu muryango w’aba bahanzi, ku ruhare rukomeye wagize mu iterambere ry’uruganda rw’imyidagaduro muri Uganda.

Yanditse agira ati: "Dukeneye imihanda itatu muri Kampala maze tukayitirira abavandimwe batatu basigaye mu muryango wa Mayanja, dushobora kutazongera kubona undi muryango nk’uyu."

Umuryango wa Mayanja wagize uruhare rukomeye mu guteza imbere umuziki wa Uganda mu myaka ishize.

Aba bahanzi kandi bahoze bafite n'abavandimwe babo, AK47 na Humphrey Mayanja, bitabye Imana mu myaka yatambutse nabo bari bafite amazina akomeye mu myidagaduro ya Uganda.

Igitekerezo cya Evelyn Mic kije gikurikirana nicyo umuhanzi Ray G, yari yatanze cyo gutangiza ubukangurambaga bwo gukusanya miliyari imwe y’Amashilingi ya Uganda yo gushimira Jose Chameleone ku ruhare rukomeye yagize mu ruganda rw’umuziki.

Umuryango wa Mayanja wubatse ibigwi mu myidagaduro ya Uganda