Mu mpera z'icyumweru gishize, ni bwo ku mbuga nkoranyambaga hasohotse amshashusho agaragaza Rex Kazadi wiyamamarije kuyobora Repubulika ya Demokarasi ya Congo mu kuboza kwa  2023 avuga ko yahisemo gufatanya na AFC/M23.

Yagize ati “Nishimiye kuba uyu munsi ninjiye muri Alliance Fleuve Congo. Mbashimiye mbikuye ku mutima kuba mwanyakiriye mu “cyama”. Ni iby’agaciro kujya mu ikipe yanyu. Niteguye kwitanga ku bw’indangagaciro duhuriyeho.”

Mu myaka yo hambere Kazadi yari umuyoboke w'ishyaka rya Perezida Felix Tshisekedi, UDPS (Union pour la démocratie et le progrès social), gusa muri 2023  yiyamamaje nk’umukandida wigenga.

Uyu mugabo yabwiye RFI mbere y’amatora ko ikibazo gikomeye muri Congo ari icy’umutekano, kandi ko ubuyobozi buriho bwagaragaje ko budashoboye kugikemura.

Bamwe mu ba nyekongo bavuze ko Kazadi nk'umwe wigeze kuba inshuti y'akadasohoka ya Tshisekedi yaba ari indi ntwaro ikomeye ihuriro AFC/M23 ryaba ryungutse, gusa hari n'ababyise kugambanira igihugu.