Uyu muhanzi ukunzwe cyane muri iyi minsi by'umwihariko mu ndirimbo 'Wrong Places', ndetse bamwe badatinya no kuvuga ko ari we ugiye kwikorera Afurika y'Iburasirazuba akayizamura mu ruhando mpuzamahanga mu muziki, akomeje kwitirirwa ibihugu bya Uganda na Kenya icyarimwe.

Benshi mu bakoresha imbuga nkoranyambaga cyane muri Uganda na Kenya, bakomeje kumvikana bavuga ko Joshua Baraka ari Umunya-Uganda abandi nabo bakumvikanisha ko ari Umunyakenya. 

Abavuga ibi birimo n'umuhanzi ukomeye wo muri Kenya, Bien-Aimé Baraza ukunze kugaragara ahatangirwa ubutumwa (comments section) ku mbuga nkoranyambaga ahamya ko Baraka ari Umunyakenya.

Urugero rwa hafi kuri Bien Aime ni nkaho yagiye ku mashusho ya Joshua Baraka ari kuri konti ye ya Instagram, aririmba muri 'Afro Nation', akandika ati "Ibendera rya Kenya riri kuzamurwa".

Abanya-Uganda nabo ntibasiba kwerekana Abanyakenya ko bibeshya bavuga ko Baraka ari uwabo, bakagaragaza ko uyu muhanzi yakuriye ndetse akaba anakorera umuziki we muri Uganda.

Joshua Baraka ni umwe mu bahanzi bagezweho muri Afurika cyane iy'Iburasirazuba 

Joshua Baraka ubwe aherutse gutangaza inkomoko ye, aho yavuze ko ise ari Umunyakenya naho nyina akaba Umunyarwandakazi, gusa we akaba yarakuriye muri Uganda. 

Yagize ati "Papa wanjye akomoka muri Kenya, i Busia, yakuriye muri Kenya, i Eldoret, ariko njye navukiye muri Uganda."

Agaruka kuri nyina umubyara, Joshua yavuze ko nyina akomoka mu Rwanda.

Ati "Na Mama ni Munyarwanda, ni nayo mpamvu ngaragara nk'abantu bo mu Burengerazuba bwa Uganda."

Tugaruka kuri ya mvugo igira iti 'Iyo ukize baraza', aha byagaragazwa n'uko mbere Joshua Baraka ataramamara imvugo nk'izi zitumvikanaga kure gusa aho yamamariye ubu ibihugu byombi birarwanira kumwiyitirira.

Bien Aime ni umwe mu Banyakenya bakunze kugaragara berekana ko Joshua Baraka ari uwa Kenya