BDF yahujwe na BRD

Guverinoma y’u Rwanda yemeje ko Ikigega cy’Iterambere gishinzwe guteza Imbere Imishinga (BDF) na Banki y’u Rwanda Itsura Amajyambere (BRD), bihuzwa hagamijwe gushyiraho urwego rukomeye ruzafasha guteza imbere abashoramari n’abacuruzi bo mu gihugu hose.

Ni mpinduka zigamije guhuza ubushobozi bwa BDF ikunze gukorana n’abacuruzi bato n’abaciriritse (SMEs) n’ubushobozi bwa BRD bwo gutanga inguzanyo nini, ubunararibonye mu by’inganda zitandukanye n’imiyoborere y’inzego.

Ibi biri mu rwego rwo kunoza imitangire ya serivisi no kongera imikorere n’imikoranire y’inzego.

Guhuzwa kwa BDF na BRD byitezweho kuzagira inyungu ku bacuruzi n’abashoramari mu bijyanye no kugabanya igihe cyo gutegura ibisabwa ku bashoramari bashaka inguzanyo binyuze mu mabanki n’ibigo by’imari iciriritse bafatanyije ndetse no kwihutisha uburyo bwo kubona inguzanyo.

Ibi bizagira uruhare no mu kwagura imiyoboro mu gihugu hose, aho serivisi zizatangwa ku buryo bwagutse mu Mijyi no mu byaro hifashishijwe ikoranabuhanga.

Izi mpinduka kandi ni intambwe ikomeye mu guteza imbere urwego rw’abikorera binyuze mu koroshya uburyo bwo kubona igishoro, bikaba biri mu murongo wa Gahunda y’Igihugu yo Kwihutisha Iterambere (NST1) n’Icyerekezo 2050.