Ni igikorwa cyabereye mu Karere ka Musanze mu Ishuri Rikuru rya Gisirikare, kuri uyu wa Gatanu taliki 28 Werurwe 2025 mu gusoza amasomo yabo. 

Aba ba Ofisiye bose hamwe ni 75, barimo 71 ba RDF, babiri ba Polisi y’Igihugu ndetse n’abandi babiri bo mu rwego rw’Igihugu rushinzwe Igorora bari bamaze ibyumweru 21 bahabwa amasomo abongerera ubumenyi, ku buryo bwo guhanahana amakuru, kuyobora ingabo ku rugamba, kunoza imikorere y’akazi kabo ko mu biro n’ayandi.

Umugaba Mukuru w’Ingabo zirwanira ku butaka, Maj Gen Vincent Nyakarundi, wayoboye uyu muhango mu izina ry’Umugaba Mukuru wa RDF, yashimye aba ba Ofisiye bahawe impamyabumenyi nyuma yo gusoza amasomo yabo.

Ni amasomo azabafasha kunoza inshingano zabo by’umwuga. Yashimangiye ko ubumenyi n’ubuhanga bahavanye bizabafasha kurinda ubusugire bw’u Rwanda n’ubw’Akarere muri rusange.

Yagize ati “Gahunda ya RDF ishyira imbere ingamba zo kongerera ubushobozi inzego, binyuze mu burezi n’amahugurwa aba ateganyijwe, mu rwego rwo guteza imbere imikorere ihamye, ndetse n’abayobozi boherezwa mu butumwa bakaba bafite ubushobozi bwo gukemura ibibazo by’umutekano bigenda byiyongera.”

Maj Gen Nyakarundi yasabye aba ba Ofisiye basoje amasomo kubahiriza inshingano za RDF zo kurengera inyungu z’Igihugu igihe cyose. Yabibukije kandi ko ikinyabupfura ari ishingiro ry’imikorere myiza n’imyitwarire biranga Ingabo z’u Rwanda.