Ibi byabaye ku wa Gatatu tariki 3 Nzeri 2025, ubwo hari hari kuba umukino wahuje City FC Abuja yo mu gihugu cya Nigeria ndetse na JKU FC ibarizwa Zanzibar.

Uyu mukino wabaye, wari mu irushanwa ryo kwitegura Shampiyona ryiswe Tanzanite Preseason Tournament. Iri rushanwa riri kubera mu gihugu cya Tanzania.

Ubwo habaga uyu mukino wari uri kubera kuri Sitade yitwa Kwaraa byageze ku munota wa 78, inzuki zihita zinjira mu kibuga abakinnyi bose baryama hasi. Izi nzuki bivugwa ko zari ziturutse mu giti kiri hafi ya Sitade.

Usibye abakinnyi baryamye mu kibuga ariko kandi n’abafana bari muri Sitade baryamye kimwe n’abafata abashusho ndetse n’abasifuzi bayoboraga uyu mukino. Izi nzuki zimaze gutambura abasifuzi bongeye gutanga uburenganzira umukino urakomeza hakinwa iminota 12 n’iyi nyongera yari isigaye kugira ngo umukino urangire.

Si ubwa mbere ibi bibaye mu gihugu cya Tanzania kuko mu Kuboza 2019, ubwo Yanga Africans yatsindaga Iringa United ibitego 3-0, inzuki zinjiye mu kibuga abakinnyi bose baryama hasi abandi bariruka cyane.

Uyu mukino wahuzaga City FC Abuja na JKU FC warangiye City FC Abuja itahanye intsinzi y’ibitego 2-1.