Mu kwezi kwa mbere uyu mwaka wa 2025, nibwo rutahizamu w'umunyarwanda, Gitego Arthur yatandukanye na AFC Leopard yo mu gihugu cya Kenya ahita yerekeza muri Clube Ferroviário da Beira ibarizwa mu gihugu cya Mozambique.

Uyu mukinnyi akigera muri iyi kipe yahise atwara igikombe cya Super cup muri iki gihugu ndetse uyu mukino wabaye tariki 24 Werurwe 2024, yarawukinnye nubwo atatsinze igitego ariko yafashije iyi kipe kwitwara neza.

Gitego Arthur kuva icyo gihe ntarimo gusiba kunyeganyeza inshundura kuko mu mikino ya Shampiyona amaze gukina amaze gutsinda ibitego bigera 7 anatanga umupira umwe wavuyemo igitego. 

Ku munsi wejo hashize tariki 20 Mata 2025, Gitego Arthur yatsinze ibitego 2 mu mukino ikipe ye ya Clube Ferroviário da Beira yakinnye na Sporting Football Beira ukarangira ari ibitego 6-0.

Uyu mukino Gitego Arthur yitwaye neza dore ko ari we wabanje kuri nimero 9 ndetse ku munota wa 32 atsinda igitego cye cya mbere ari icya Kabiri kibonetse mu mukino ndetse no ku munota wa 41 ariyongeza atsinda igitego cye cya Kabiri.

Ikipe y'igihugu y'u Rwanda Amavubi ishobora kuzaba ifite umukinnyi mwiza ukina nk'umwataka mu minsi iri imbere, Gitego Arthur nakomeza ku muvuduko wo gutsinda ibitego ariho muri ibi bihe bye byiza.

Gitego Arthur arimo kwitwara neza muri Mozambique