Kinyarwanda
English
Ukraine yongeye gushinja u Burusiya kuyigabaho ibitero bya Drone
Igisirikare cya Ukraine kivuga ko intara zitari nke zaraye zirashweho n’indege zitagira abapilote (drone) z'Uburusiya, nyuma y’amasaha macye gusa hemeranyijwe agahenge ka Pasika k'amasaha 30 kari katangajwe na Moscou.
Igisirikare cya Ukraine kirwanira mu kirere cyasohoye ubutumwa bwo kumenyesha intara ya Kyiv, cyo kimwe no mu ntara za Kherson, Dnipropetrovsk, Cherkasy, Mykolaiv na Zaporizhzhia ko Uburusiya bwarenze ku gahenge.
Mu mujyi wa Mykolaiv uri mu Majyepfo, umuyobozi waho, Oleksandr Senkevych, yavuze ko humvikanye ibiturika. Ntibashoboye kumenya nimba hari abapfuye cyangwa niba hari abakomeretse.
Igisirikare cy’Uburusiya ntacyo kiratangaza kuri ibi bitero bivugwa. Aka gahenge kari katangajwe na Perezida Vladimir Putin karangiye saa kumi n’ebyiri z'ijoro ku cyumweru mu masaha ya Moscou, ni ukuvuga I saa tanu zo ku isaha y’i Kigali.
