Ku wa Mbere tariki 29 Ukuboza 2025, nibwo hatangiye gukinwa imikino ya nyuma yo mu itsinda y'igikombe cy'Afurika kirimo kubera mu gihugu cya Marocco.

Imikino yo mu itsinda rya mbere yakinwe mu ijoro ryacyeye, ikipe y'igihugu ya Marocco yanyagiye Zambia ibitego 3-0 mu gihe Comoros yanganyaga na Mali 0-0. Ibi byatumye ikipe y'igihugu ya Marocco ndetse na Mali ari zo zizamuka, Zambia na Comoros zirasezererwa.

Ku isaha ya saa Kumi n'ebyiri z'umugoroba nibwo hakinwe imikino isa nk'ikomeye, aho ikipe y'igihugu ya Afurika y'epfo yakinnye na Zimbabwe umukino uza kurangira Afurika y'epfo itsinze Zimbabwe ibitego 3-2. 

Ni umukino wari ukomeye cyane kuko Zimbabwe ni imwe mu makipe yahaye akazi gakomeye Afurika y'epfo kuko yatsindaga igitego ikishyura ariko ku bw'Amahirwe iza kubona Penalite mu minota ya nyuma itsindwa neza na Oswin Appolis bituma Afurika y'epfo itahana amanota atatu.

Ku rundi ruhande ikipe y'igihugu ya Misiri yananiwe gutsinda Angola nubwo yari yamaze kubona itike hakiri kare. Umutoza w'ikipe y'igihugu ya Misiri kunganya uyu mukino wabonaga yabiteguye kuko yabanjemo ikipe ya Kabiri kugira ngo aruhutse abakinnyi be beza afite.

Muri iri tsinda rya kabiri, ikipe y'igihugu ya Misiri yazamutse ari iya mbere n'amanota 7 maze Afurika y'epfo izamuka ifite amanota 6 ari iya Kabiri.

Kuri uyu wa Kabiri harakomeza iyi mikino y'igikombe cy'Afurika hakinwa imikino yo mu itsinda C ndetse na D. Ikipe y'igihugu ya Tanzania irakina na Tunisia, Uganda ikine na Nigeria. Ikipe y'igihugu ya Benin irakina na Senegal maze Botswana ikine na DR Congo.