Imyanzuro yafashwe nyuma yo kwemeza raporo ya Komisiyo y'Imiyoborere n'Uburenganzira bwa Muntu, ku gikorwa cyo kugenzura uruhare rw'ihame ry'uburinganire bw'abagore n'abagabo mu guteza imbere umuryango nyarwanda mu nteko rusange ya Sena yabaye kuri uyu wa gatanu tariki ya 19 Mutarama 2026.

Inteko Rusange ya Sena yafashe imyanzuro ireba Guverinoma ikurikira: Kongerera abaturage ubumenyi ku ihame ry’uburinganire bw’abagore n’abagabo no ku mategeko agamije kurengera umuryango. Gushyiraho ingamba zigamije gukemura ikibazo cy’ababana batarashyingiranywe mu buryo bwemewe n’amategeko.

Abasenateri bagaragaje ibikwiye kwitabwaho mu rwego rwo gukemura ibibazo byagaragajwe ko bibangamiye umuryango nyarwanda.

 Ubutumwa bwa Sena buragira buti "Nubwo hari intambwe yatewe mu kwimakaza ihame ry’uburinganire hari ibikwiye kwitabwaho birimo: Imyumvire ya bamwe mu baturage na bamwe mu bayobozi itaragera ku rwego rushimishije."

bukomeza bugira buti" Ibibazo bibangamiye umuryango birimo ubusinzi, ubushoreke, ubusambanyi, abangavu baterwa inda, abana batiga, imirire mibi n’igwingira mu bana, Kudohoka kw’ababyeyi mu guha abana uburere bukwiye, ababana batarashyingiranywe mu buryo buteganywa n’amategeko, amakimbirane mu muryango n’ubutane bukomeza kwiyongera."

Mu turere dutandukanye abagabo n'abagore bakunze kumvikana mu  itangazamakuru bitana ba mwana ku bitera amakimbirane mu miryango. Abagabo bamwe bashinja abagore kumva nabi Uburinganire bagahohotera abagabo ndetse bashinjwa gufata ihame ry'Uburinganire uburinganire nko kwigaranzura abagabo.

Abagore nabo bashinja abagabo kwishora mu businzi, ubuharike n'ubushoreke bakibagirwa kwita ku miryango yabo. 

Ibibazo byagaragajwe n'abasenateri bigaragara mu bice bitandukanye bikaba binakurura ubuzererezi mu bana kubera kutitabwaho n'ababyeyi babo.