Imyigaragambyo igeze ku munsi wa gatatu muri Tanzania. Abasore n'inkumi bari mu mihanda ntibashaka ubutegetsi bwa CCM, ishyaka ryayoboye igihugu kuva mu 1961 icyo gihugu cyabona ubwigenge.

AFP ifite abanyamakuru bari gukurikiranira hafi ibiri kubera I Dar Es Salaam, umujyi w'ubucuruzi yatangaje ko hamaze gupfa abantu 350 muri uwo mujyi ndetse na 200 muri Mwanza, ariko imibare ya nyayo ntiratangazwa ku buryo hari abapfuye ntibimenyekane.

John Kitoka,umuvugizi wa CHADEMA ishyaka ritavuga rumwe na CCM yabwiye AFP ko urebye mu bindi bice bya Tanzania ushobora kubona imibare y'abapfuye irenga ku yatangajwe na Leta.

Imyigaragambyo yatangiye ku wa 29 Ukwakira 2025 nyuma y'umunsi w'amatora. Abigaragambya babajwe bikomeye cyane n'ifungwa ry'abatavuga rumwe n'ubutegetsi bitewe nuko Perezida Samia Suluhu atifuzaga uwo bahangana ufite imbaraga.

Imiryango mpuzamahanga ikorera I Dar Es Salaam yasabye abakozi bayo gukorera mu rugo, Ambasade y'Amerika nayo yasabye abanyamerika bose kwirinda gukora ingendo zo ku butaka usibye ko n'ikibuga cy'indege cya Dar Es Salaam cyafunzwe ku buryo ingendo zahagaze.

Ni imyigaragambyo yagize ingaruka ku Rwanda bitewe nuko Urugaga rw'abikorera'PSF' rwatangaje ko amakamyo 5 yatwitswe arakongoka ariko andi 1000 yahagaze kugirango hatagira uyagirira nabi.

Hari itegeko ryo gutaha 'Curfew ' mu duce turimo Mbagala, Gongo la Mboto na Kiluvya ndetse hoherejwe abapolisi bari kurinda imihanda.

Kuva mu 2021 Samia yajya ku butegetsi asimbuye nyakwigendera John Pombe Magufuli wapfuye amarabira, abaharanira uburenganzira bwa muntu bakunze kuvuga ko abatoteza, agafunga impirimbanyi z'uburenganzira bwa muntu, abanyamakuru ndetse habayeho no gufunga Tundu Lisu ,wari kumujegeza mu matora.

Kuri ubu televiziyo y'igihugu ikomeje gutangaza ibyavuye mu matora hirya no hino mu gihugu ariko Samia ari kwiganza ku ijanisha rya 95.

 Aya majwi ntabwo abigaragambya bashaka kuyumva kuko abarya mu matwi ndetse bashyize igitutu ku kanama gashinzwe amatora ko bakwiriye guhagarika gutangaza ibyavuye mu matora bitewe nuko nta bantu bahatanye na Samia Suluhu Hassan.

Tanzania ituwe na miliyoni 71, ikigero cy'ubushomeri kiri ku 9%.