Ku cyumweru tariki 26 Ukwakira 2025, nibwo Real Madrid yakinnye na FC Barcelona mu mukino wa Shampiyona ya Espagne urangira Real Madrid itsinze ibitego 2-1. Ni umukino wasojwe n'imvururu hagati y'abakinnyi ba Real Madrid ndetse n'aba FC Barcelona.

Ku munota wa 72, ubwo Real Madrid yari yamaze kubona intsinzi y'ibitego 2-1, umutoza Xabi Alonso yaje gusimbuza Vinicius Jr ntiyabyakira neza ndetse asohoka mu kibuga atukana anitotomba mu buryo butashimishije benshi ndetse bigaragaza isura mbi iyi kipe.

Nyuma haje kuba ibiganiro hagati ya Vinicius Jr ndetse n'ubuyobozi bwa Real Madrid, biba ngombwa ko uyu musore afata umwanzuro wo gusaba imbabazi abakunzi ba Real Madrid ndetse n'ikipe muri rusange.

Kuri uyu wa Gatatu tariki 29 Ukwakira 2025, nibwo Vinicius Jr yabyutse asaba imbabazi abakinnyi bakinana muri Real Madrid ubwo basubukuranga imyitozo nyuma y'ikiruhuko cy'iminsi ibiri bari bahawe n'umutoza w'iyi kipe.

Uyu mukinnyi Kandi yaje no gufata umwanya abinyujije ku mbuga nkoranyambaga ze, asaba imbabazi abakunzi, abakinnyi ndetse na Perezida wa Real Madrid, Florentino Perez.

Yagize ati " Uyu munsi ndashaka gusaba imbabazi abakunzi bose ba Real Madrid bitewe nuko nitwaye ubwo nasimbuzwaga mu mukino wa Clásico. Nk’uko nabikoze mu myitozo y’uyu munsi, ndongera nsabe imbabazi bagenzi banjye, ikipe ndetse na perezida wa Real Madrid."

Yakomeje agira ati " Rimwe na rimwe, urukundo n’imbaraga byo gutsinda no gufasha ikipe yanjye biranganza, bigatuma mvuga cyangwa nkora ibintu bitari byo. Umuhate ngira wo gushaka intsinzi ushingiye ku rukundo rwinshi mfitiye iyi kipe n’ibyo ihagarariye byose. Ndabasezeranya ko nzakomeza kurwanira inyungu za Real Madrid buri segonda, nk’uko nabigenzaga kuva ku munsi wa mbere."

Vinicius Jr afitanye amasezerano na Real Madrid azarangirana n'impeshyi ya 2027, uyu musore yanze kuyongera kubera ibyo atumvikanaho n'ubuyobozi. Vinicius Jr arifuza umushahara ujya kwegera uwa Kylian Mbappé ariko ubuyobozi bwa Real Madrid ntabwo burimo kubyemera. Bivugwa ko umutoza atumvikana n'uyu mukinnyi nubwo barenzaho bagakorana.

Vinicius Jr ntabwo yishimiye gusimbuzwa kuri El Clasico