Ku wa 07 Mutarama 2026 Urukiko rw'Ibanze rwa Nyarugenge rwaburanishije urubanza ruregwamo DJ Toxxyk ukurikiranweho ibyaha bine;gutwara yasinze, kwica bidaturutse ku bushake, gukoresha ibiyobyabwenge no gutwara nta ruhushya. 

Ahagana saa tatu na 51 Urukiko rwahamagaye DJ Toxxyk abazwa imyirondoro. Nyuma Urukiko rwamumenyesheje ko akurikiranyweho ibyaha bine. Ariko DJ Toxxyk yahise amenyesha inteko iburanisha ko atiteguye kuburana. 

Yabajijwe impamvu avuga ko atabonye dosiye kandi ko atiteguye kuburana. DJ Toxxyk yari yunganiwe n'abanyamategeko babiri (2) nabo bashimangiye ko babonye dosiye ku wa 06 Mutarama 2026.

Abunganira DJ Toxxyk basobanuye ko basaba isubikwa ry'urubanza. Umwe mu bunganira DJ Toxxyk yasobanuye ko Ubushinjacyaha butigeze bumenyesha DJ Toxxyk dosiye ngo amenye ibyaha akurikiranwaho.

Inteko iburanisha yabajije abunganira DJ Toxxyk iminsi bifuza kugirango bitegure neza. Abunganizi bavuze bavuze ko bifuza iminsi itanu (5). 

9:55 Ubushinjacyaha bwahawe umwanya

Ubushinjacyaha bwavuze ko uwunganirwa afite uburenganzira budahungabanwa. Yifashishije Itegekonshinga avuga ko Ubushinjacyaha buhagarariye inyungu za rubanda kandi na DJ Toxxyk ari mu bashakirwa ubutabera. Ubushinjacyaha bwamenyesheje Urukiko ko rwsubikwa ariko ntihazabeho izindi mpamvu. 

Nyuma yo kumva impande zombi Urukiko rwavuze ko urubanza rusubitswe noneho rukazaburanishwa ku wa 14 Mutarama 2026 hazaba ari ku wa Gatatu saa tatu za mu gitondo.

Urukiko rwibukije ko nta yindi mpamvu izatangwa kuri uwo munsi.