Mu ijoro ryacyeye tariki 6 Mutarama 2026, ubuyobozi bwa Rayon Sports nibwo bwatangaje ko bwamaze gusinyisha myugariro Nshimirimana Annonciatte ukomoka mu gihugu cy'u Burundi.

Ni icyemezo cyari kimaze iminsi aho byavugwaga ko ubuyobozi bushya buyobowe na Murenzi Abdallah bwifuza gukomeza Rayon Sports yaba iy'Abagabo ndetse n'iy'abagore cyane ko nayo muri uyu mwaka w'imikino irimo guhangarwa n'amakipe mu buryo budasanzwe.

Uyu mukinnyi w'imyaka 21, yongewe mu ikipe ya Rayon Sports y'abagore nyuma y'ibibazo byagiye bigaragara byo kwinjizwa ibitego bya hato na hato ndetse bikaba bikomeje gutuma igenda inyuma ya Police WFC iyoboye urutonde rw'agateganyo rwa Shampiyona uyu mwaka.

Nshimirimana Annonciatte ni umurundi ukina nka myugariro w'imyaka 21, uyu mukinnyi Saison ishize ya 2024-2025, yakinaga muri Top Girls Academy ndetse Kandi yanakinnye muri Fountain Gate Princess yo mu gihugu cya Tanzania kuva 2022 kugeza 2024.

Uyu mukinnyi ni umwe muri ba myugariro beza bari mu gihugu cy'u Burundi, akina akoresheje cyane ukuguru kw'iburyo. Amakuru ahari avuga ko nyuma y'uyu, Rayon Sports iraza gusinyisha n'abandi kugira ngo bayikomeze yongere guhatana ku gikombe nkuko yagitwaye umwaka ushize.

Ikipe ya Rayon Sports WFC ku rutonde rw'agateganyo rwa Shampiyona y'u Rwanda mu bari n'abategarugori, iri ku mwanya wa kabiri n'amanota 23. Ikipe ya Police WFC niyo iyoboye uru rutonde kuko ifite amanota 26.

Nshimirimana Annonciatte ni umukinnyi mushya wa Rayon Sports 

Annonciatte aje muri Rayon Sports yarakinnye muri Fountain Gate Princess yo muri Tanzania