Kinyarwanda
English
Swahili
Umwuzure wishe abantu 51 muri Texas
Imvura nyinshi yaguye muri Leta ya Texas muri Leta Zunze Ubumwe za Amerika, yateje umwuzure ukomeye wahitanye abantu 51, abandi benshi bakaba bagishakishwa.
Uyu mwuzure watewe n’imvura yaguye mu ijoro ryo ku wa Gatanu tariki 4 Nyakanga 2025, ituma amazi y’uruzi azamukaho metero umunani mu minota 45. Wibasiye cyane agace Kerr, aho amazi yazamutse ku muvuduko utunguranye asenya inzu, yangiza imodoka ndetse n’ahantu abanyeshuri bari mu biruhuko bahurira.
Kuwa 6 Nyakanga 2025, nibwo byemejwe ko abantu 51 barimo abana 15 bishwe n’uyu mwuzure, mu gihe abandi benshi bakomeje gushakishwa.
France 24 yatangaje ko abantu 43 aribo baguye mu gace ka Kerr, naho abandi umunani bagwa mu duce turi mu nkengero zaho.
Ahazwi nka Camp Mystic hafi y’umugezi wa Guadalupe, niho benshi mu bishwe n’uyu mwuzure babonetse.
Ubuyobozi bwatangaje ko abantu barenga 850 barokowe mu masaha 36 ashize.
