Ikipe y’Igihugu ya Basketball mu bagabo yari ihagarariye u Rwanda muri Angola mu mikino y’Igikombe cy’Afurika cya Basketball (FIBA AfroBasket 2025), yasezerewe itsinzwe imikino yose yo mu matsinda. 

Mu mukino wa nyuma muri iyi mikino ku ikipe y'Igihugu y'u Rwanda, yatsinzwe na Cape Verde amanota 75 kuri 62, ibi biza gutuma isoreza ku mwanya wa nyuma mu itsinda rya mbere (Group A) n’amanota 3 ihita inasezererwa muri iyi mikino. 

Mu yindi mikino yo muri iri tsinda u Rwanda rwatsinzwe na Côte d’Ivoire amanota 78 kuri 70 mu mukino wa mbere, mu mukino wa kabiri rwongeye gutsindwa na Repubulika Iharanira Demokarasi ya Congo amanota 65 kuri 58. 

Ikipe y'abagabo yasezerewe idatsinze umukino n'umwe 

Uretse ikipe y'abagabo, n’ikipe y’Igihugu y’abagore na yo yasezerewe mu mikino ya 'FIBA Afrobasket 2025' yaberaga muri Côte d’Ivoire, nta intsinzi n'imwe itahanye. Iyi kipe yasoreje ku mwanya wa nyuma mu itsinda rya kane (Group D) n’amanota 2, ndetse inanirwa no kurenga umukino wa kamarampaka (Playoffs), nyuma yo gutsindwa na Senegal amanota 80 kuri 37.

Ikipe y'Igihugu y'abagore na yo yatsinzwe imikino yose muri FIBA Afrobasket 2025 

Iyi kipe y'igihugu ya bagore, mu mikino y'Igikombe cy’Afurika giheruka cya 2023 cyabereye i Kigali, yari yasoreje ku mwanya wa kane nyuma yo kugera mu mikino ya 1/2 ariko ntiharenge, ugereranyije n'uyu mwaka, uyu umusaruro wari mwiza.

Amakipe y'Igihugu y'u Rwanda, bigaragara ko yasubiye inyuma, urebeye cyane ku rutonde rw’impuzamashyirahamwe y’umukino wa Basketball ku Isi, FIBA. Uru rutonde rwasohotse tariki ya 8 Kanama 2025, rugaragaza ko ikipe y’Igihugu y’u Rwanda mu bagabo iri ku mwanya wa 15 muri Afurika, ikaba iya 93 ku rutonde rw’Isi muri rusange.

Ikipe y'Igihugu y'u Rwanda mu bagabo iri ku mwanya wa 93 ku Isi 

Mu bagore, u Rwanda ruri ku mwanya wa 11 muri Africa na ndetse rukaba ku mwanya wa 72 ku Isi, muri iki cyiciro rukaba ruri no mu bihugu nibura bitanu byatakaje amanota kuko rwatakaje agera kuri 7.

Ikipe y'Igihugu y'abagore nayo iri ku mwanya wa 72 ku Isi