Ni umukino wakaniwe cyane n'abasore b'Amavubi kuko mu myitozo yakozwe ku wa mbere tariki 8 Nzeri 2025, bose bari bahari Kandi ubona ko bameze neza bishimye.

Ntabwo bisanzwe ko ikipe y'igihugu y'u Rwanda Amavubi iherekezwa n'Umuyobozi wa FERWAFA ariko kuri iyi nshuro Shema Ngonga Fabrice ndetse n'abamwe mu bo bayoborana bari muri Afurika y'epfo aharabera uyu mukino uraba utoroshye.

Ikipe y'igihugu ya Zimbabwe kugeza ubu iri ku mwanya wa nyuma mu itsinda kuko ifite amanota 4, mu gihe ikipe y'igihugu y'u Rwanda Amavubi yo ifite amanota 8.

Kapiteni w'u Rwanda, Bizimana Djihadi, yatangaje ko abakinnyi biteguye ndetse baraza kwitwara neza. Ibi kandi byashimangiwe n'abatoza b'Amavubi kuko bababona nta kindi cyo gukora kuri uyu mukino usibye kubona amanota 3.

Mu bakinnyi 11 baraza kubanza mu kibuga kuri uyu mukino ntabwo barimo Nshuti Innocent kuko afite amakarita 2 y'umuhondo atamwemerera gukina uyu mukino kuko muri uku gushaka itike iyo wujuje amakarita 2 ntabwo uba wemerewe gukina umukino ukurikiye. Byitezwe ko umusimbura we ari Biramahire Abeddy.

Abakinnyi 11 bitezwe kubanza mu kibuga ku rugero rwa 95%

Mu izamu: Ntwari Fiacre 

Ba myugariro: Manzi Thierry, Mutsinzi Ange, Kavita Phanuel, Niyomugabo Claude 

Abo hagati: Bizimana Djihadi, Muhire Kevin Mugisha Bonheur 

Ba rutahizamu: Biramahire Abeddy, Kwizera Jojea, Mugisha Gilbert