Umunyarwenya Trevor Noah wayoboye itangwa ry'ibihembo bya Grammy yateye urwenya ku muraperi Nicki Minaj na Perezida Donald Trump. 

Nyuma y'uko ibyo bibaye Perezida Trump yanze kuripfana asubiza Trevor Noah ko nta mpano afite,ari umuhombyi kandi yazahajwe n'inzoga.

Yari inshuro ya gatandatu Trevor Noah yakira ibyo bihembo ageze hagati avuga ati"Nicki Minaj ntari hano muri Crypto.com Arena, California. Ubu aracyari muri White House na Perezida Donald Trump. Bari kuganira ku ngingo ziremereye".

Trevor Noah yanavuze kuri Trump wifuza gutwara Greenland, bitewe n'uko ngo yifuza kuhatemberera na Bill Clinton.

Nyuma y'ayo magambo Perezida Donald Trump yanditse amunyomoza ko atigeze ajyana na Bill Clinton ku kirwa kitwa Epstein.

Trump yise Trevor Noah umuhombyi amwibutsa gushaka amakuru y'impamo mbere yo gutera urwenya ku byo atazi.

Trump yavuze ko yiteguye kujyana mu nkiko Trevor Noah ku buryo asigarana isomo ntazongere kumumenyera. Trump yavuze ko Trevor Noah nta mpano afite kandi ko ari umunyantege nke w'umusinzi.

Trevor Noah wamamaye mu kiganiro kitwa 'The Daily Show' yatangiye mu 2015, bimworohera guhuza n'abitabira itangwa rya Grammy Awards.

Akundirwa uburyo ahuza urwenya n'umuziki, akaba ashobora kugenzura ibihe bitunguranye muri uwo muhango ku buryo byose abikora mu rwenya. 

Yasoje itangwa ry'ibyo bihembo avuga ko ari inshuro ya nyuma abiyoboye. Yahereye muri Covid-19 ayobora ibyo birori.

Muri kiriya kiganiro yabarirwaga miliyoni 8$ mu kugikora mu cyiciro kimwe (Season). Mu 2017 yasinye andi masezerano ya miliyoni $`6. Ayo masezerano yarangiye ku ya 8 Ukuboza 2022.

Imibare yerekana ko muri Covid-19 yakoreshaga abakozi 25 bamufashaga gutegura ikiganiro. Mu 2019 yakoze ibitaramo by'urwenya byinjije miliyoni $14. Yanditse igitabo cy'abana 'Into the Uncut Grass' cyabaye icya mbere mu kugurwa kuri The New York best seller.

Mu 2024 yakoze ibitaramo byamwinjirije miliyoni $30. Forbes yanditse ko Trevor Noah yishyurwa $20,000 mu ijoro rimwe ryo kwakira ibihembo bya Grammy. Icyakora mu 2021 ku nshuro ya mbere yahembwe $5000.

Kuri ubu Trevor Noah abarirwa miliyoni $100 z'umutungo abitse. Trevor Noah ni umunyamayeri cyane ku buryo ibidashoboka abigerageza kandi bigacamo.