Ku wa 4 Kanama 2025 Umunyapolitiki Umuhoza Ingabire Victoire yajuririye urukiko rwisumbuye rwa Nyarugenge arusaba kudaha agaciro umwanzuro w'urikiko rw'ibanze rwa Kicukiro kuko urubanza rwaregewe urwego rwa mbere byanyuze mu buryo budakurikije amategeko.

Me Gatera Gashabana wunganira Umuhoza Ingabire Victoire yasabye urukiko rw'isumbuye ko rwatesha agaciro ibyemezo byose byafashwe n'urukiko rw'ibanze rwa Kicukiro.

Yakoresheje ingingo ziri mu itegeko nshinga n'izo mu gitabo mpanabyaha zerekana ko urukiko rw'ibanze rwa Kicukiro rutagomba kuburanisha urubanza rw'uwo yunganira. 

Ati"Ibyo ngibyo urukiko rwarabyirengagije ahubwo rutegeka ko Madame Ingabire Umuhoza Victoire afungwa iminsi 30 y'agateganyo. Twaberetse ingingo 194 iteganya y'uko iyo hakozwe ayo makosa yose, ibyakozwe byose biba impfabusa noneho uregwa agahita arekurwa."

Ingabire Umuhoza Victoire yabwiye urukiko ko Ubushinjacyaha bwashingiye ku kiganiro cyakozwe n'umunyamakuru Theoneste wa Umubavu TV, ikindi kimenyetso n'amajwi yo kuri telefoni aganira n'uwo munyamakuru.

 Yabwiye urukiko ko ibyaha akurikiranweho harimo ibitarenza ibihano by'amezi atandatu ku buryo asanga adakwiriye gufungwa iminsi 30 y'agateganyo.

Ingabire Umuhoza Victoire yasabye urukiko rw'isumbuye rwa Nyarugenge kudaha agaciro ibyaha bibiri birimo gutangaza amakuru y'ibihuha no guteza imvurura muri rubanda.

 Yasobanuye ko nta mpamvu zikomeye, Ubushinjacyaha bwigeze butanga bityo adakwiriye kubikurikiranwaho.

Urukiko rwasuzumye icyaha cyo guteza imvururu muri rubanda nyamara ntiyigeze akiregerwa , kuri we asanga gikwiriye kuvamo.

Muri make yasabye ko ibyaha byo gucura umugambi cyangwa se guteza imvururu muri rubanda yakaba agihanagurwaho. Yibukije Ubushinjacyaha ko mu bujurire atari ho batangira impamvu zikomeye zituma ushinjwa afungwa by'agateganyo. 

Ingabire Umuhoza Victoire yasabye urukiko rw'isumbuye rwa Nyarugenge kumurekura akaburana ari hanze. Me Gatera Gashabana nawe yunze mu byavuzwe n'umukiriya we asobanura ko urukiko rw'ibanze rwa Kicukiro rwanze ubusabe bw'uwo yunganira. 

Me Gatera Gashabana yavuze ko urukiko rw'ibanze rwamufunze kugirango adakora icyaha nyamara bihananye n'ibitegekwa n'amategeko.

Ubushinjacyaha bwari bwagaragaje impungenge ko adafunzwe yatoroka iperereza ariyo mpamvu basabye ko afungwa iminsi 30 by'agateganyo. Me Gatera Gashabana asanga nta gishya ku iperereza ryakozwe n'ubushinjacyaha. 

Uyu munyamategeko yabwiye urukiko rw'isumbuye rwa Nyarugenge ko Ingabire Umuhoza Victoire kuva yahabwa imbabazi na Perezida wa repubulika yitwaye neza nk'uko yabisabwaga.

 Yavuze ko hari igihe yigeze gusaba kujya gusura umuryango we uba I Burayi ariko yangiwe ubwo burenganzira arituriza.

Ubushinjacyaha bwahawe umwanya burisobanura bwa kabiri

Ingingo y'106 yo mu gitabo mpanabyaha ivuga ko Ubushinjacyaha bufite uburenganzira bwo gukurikirana ushinjwa bityo akaba yafungwa iminsi 30 y'agateganyo cyangwa se akaba yakurikiranwa ari hanze.

Ntabwo iyo ngingo iteganya ko Ubushinjacyaha bwategeka urukiko ahubwo rufata umwanzuro mu bwisanzure.

Ku kibazo cyo kuba yarafunzwe by'agateganyo, Ubushinjacyaha bwasobanuye ko biri mu itegeko aho ryemerera Ubushinjacyaha gukomeza gukora iperereza.

Iyo urukiko rw'ibanze rusanze rudakwiriye kwakira cyangwa se umucamanza adafite ububasha bwo kuburanisha akurikiranweho ibyaha runaka.

Ubushinjacyaha bwavuze ko nta mpamvu yari ihari yo guhagarika urwo rubanza. Ubushinjacyaha bwabwiye urukiko ko batari kuburana mu miziki ku byaha bitandatu Ingabire Umuhoza Victoire akurikiranyweho ahubwo bari ku minsi 30 y'agateganyo kandi batanze ibimenyetso bifatika byagezweho .

Ingabire Umuhoza Victoire yongeye kuvuga ko adakwiriye gushinjwa gutangaza amakuru y'ibihuha aho yavuze ko cyashaje n'icyaha cyo guteza imvururu muri rubanda nacyo yasobanuye ko nta bisobanuro Ubushinjacyaha bwatanze mu rukiko rw'ibanze.

 Icyaha cyo kugiririra nabi ubutegetsi buriho, Ingabire Victoire yavuze ko nta mpamvu zatanzwe. Icyaha cyo gukwiza amakuru atariyo cyangwa se icengezamatwara rigamije kwangisha Leta y'u Rwanda amahanga, hano yavuze ko bashingiye ku majwi atemera.

Yavuze ko ayo majwi ntayo bashyize muri sisiteme.

Icyaha cyo kwigaragambya, Ingabire Umuhoza Victoire yavuze ko kitigeze gisuzumwa kandi cyarashaje bityo akaba adakwiriye kubikurikiranwaho.

Nyuma yo kumva impande zombi urukiko rwavuze ko umwanzuro uzasomwa ku wa 7 Kanama 2025 saa cyenda za nimugoroba. Urubanza rwamaze amasaha asaga ane dore ko rwatangiye saa tatu za mu gitondo rukarangira saa saba na 18.