Aba bagejejweho ikiganiro kirambuye cyagarutse ku miterere y’umutekano mu gihugu no mu karere, ndetse n’uruhare rw’Ingabo z’u Rwanda mu bikorwa byo kubungabunga amahoro mu bufatanye mpuzamahanga n’ubushingiye ku mubano hagati y’ibihugu.

Itsinda ry’abitabiriye ryakiriwe n’Umuyobozi mukuru ushinzwe Ubufatanye Mpuzamahanga mu bya Gisirikare Brig Gen Patrick Karuretwa.

Minisitiri w’Ingabo, Juvenal Marizamunda, yashimiye abitabiriye uruhare rwabo mu gukomeza gushimangira imikoranire na Minisiteri y’Ingabo mu rwego rwo kubungabunga amahoro n’umutekano.

Yakomeje amvuga ko u Rwanda rwiyemeje gukorana bya hafi n’abafatanyabikorwa bishingiye mu masezerano n’ibihugu ndetse n’imiryango mpuzamahanga mu guhangana n’ibibazo bishya by’umutekano.

Brig Gen Patrick Karuretwa we yagaragaje ishusho ku miterere y’umutekano mu Rwanda no mu karere muri rusange.

Yabomeyejo kwibutsa ko ari ingenzi gukomeza ubufatanye, guhanahana amakuru no gukorana n’ibihugu by’inshuti n’imiryango mpuzamahanga mu kwimakaza amahoro haba mu karere no ku rwego rw’Isi.

Abitabiriye baje kugirana ibiganiro bifunguye ndetse bungurana ibitekerezo ku bibazo bihuriweho by’umutekano, imiterere y’umutekano mu karere, hamwe n’amahirwe yo kunoza ubufatanye no kubwagura.

Iki gikorwa cyerekana icyerekezo gihamye cy’Ingabo z’u Rwanda mu guteza imbere dipolomasi ya gisirikare no gushimangira ubwumvikane n’abafatanyabikorwa mu bya gisirikare.

Iki kiganiro cyitabiriwe n’abahagarariye ibihugu n’Imiryango Mpuzamahanga 25 birimo Leta Zunze Ubumwe z’Amerika, u Bufaransa, u Bwongereza, u Budage, u Burusiya, u Bushinwa, u Buyapani, Israel, Yorudaniya, Turukiya, Suede, Pologne, Angola, Ghana, Botswana, Koreya y’Epfo, Zimbabwe, Sudani, Kenya, Repubulika ya Cheque, Tanzania, Namibia, Umuryango w’Ubumwe bw’u Burayi (EU), ndetse n’Umuryango Mpuzamahanga utabara Abantu (ICRC).