Aya masezerano yasinyiwe i Kigali mu ruzinduko rw’akazi rw’Umuyobozi wa Dipolomasi ya Somalia, H.E. Abdisalam Abdi Ali, wakiriwe na Ambasaderi Olivier Nduhungirehe, Minisitiri w’Ububanyi n’Amahanga n’Ubutwererane w’u Rwanda.

Abaminisitiri bombi bashimangiye ko umubano w’u Rwanda na Somalia ushingiye ku bwubahane, intego zisangiwe ndetse no ku mwuka wa Pan-Africanisme, bagaragaza ko uru ruzinduko ari intangiriro y’urundi rwego rushya rwo gukomeza ubufatanye hagati y’ibihugu byombi.

Amasezerano yasinywe ateganya gukaza imikoranire mu nzego nyinshi zirimo:

ibiganiro bya politiki, ishoramari n’iterambere ry’ubucuruzi, umutekano n’ubutwererane mu by’ubugenzacyaha, ubutabera, uburezi, ubuhinzi, ikoranabuhanga, ndetse n’ubufatanye mu by’amategeko mpuzamahanga.

Ibihugu byombi byemeranyije kandi gushinga Komisiyo Ihoraho y’Ubufatanye (Joint Permanent Commission – JPC) izajya ikurikirana ishyirwa mu bikorwa ry’amasezerano ndetse ikanashakisha izindi nzego zishobora gukorerwamo ubufatanye.

Mu biganiro byabo, Abaminisitiri banaganiriye ku bikorwa byo gushaka amahoro biri kubera i Doha na Washington bijyanye n’intambara yo mu Burasirazuba bwa Repubulika Iharanira Demokarasi ya Congo (RDC). u Rwanda rwashimye uruhare rwa Somalia nk’umunyamuryango w’Inama y’Umuryango w’Abibumbye ishinzwe umutekano (UN Security Council), by’umwihariko mu itsinda rya A3+ Group, mu guteza imbere inyungu za Afurika.

Ibihugu byombi byiyemeje gukomeza gufatanya mu rwego mpuzamahanga no mu miryango myinshi biberamo kugira ngo biteze imbere intego z’ibihugu byombi n’inyungu rusange z’Afurika.