Kinyarwanda
English
Swahili
Paul Biya yatorewe kongera kuyobora Cameroun ku majwi 53.66%
Urwego Rushinzwe Kurinda Itegeko Nshinga muri Cameroun rwatangaje kuri uyu wa Mbere tariki ya 27 Ukwakira 2025 ko Perezida Paul Biya ari we watsinze amatora ya Perezida yabaye ku wa 12 Ukwakira 2025, aho yegukanye intsinzi ku majwi 53.66%.
Aya matora yari ahuriwemo n’abakandida 12 barimo na Biya w’imyaka 92 y’amavuko, uheruka kuyobora iki gihugu kuva mu mwaka wa 1982. Umunyapolitiki utavuga rumwe n’ubutegetsi, Issa Tchrioma Bakary, ni we wakurikiyeho n’amajwi 35.19%.
Gusa, ibyavuye mu matora byateje impaka zikomeye muri Cameroun, nyuma y’uko byatinze gutangazwa, bituma abashyigikiye abatavuga rumwe n’ubutegetsi bigaragambya bavuga ko amajwi yibwe. Iyi myigaragambyo yageze aho ikaza, ndetse abantu bane bahasiga ubuzima ku Cyumweru gishize.
Paul Biya, ubu ufatwa nk’umukuru w’igihugu ukuze kurusha abandi ku isi, akunze kunengwa n’abatavuga rumwe na we bamushinja gusaza, kugira intege nke no kudashobora gukomeza kuyobora igihugu mu buryo bunoze.
Kugeza ubu, abarenga 60% by’abatuye Cameroun bavuka nyuma y’uko Biya yafata ubutegetsi, ku buryo batazi undi Perezida uretse we.
Amatora yo muri Cameroun yakurikiwe n’icuraburindi ry’ivugurura rya politiki muri iki gihugu, aho impungenge zagaragaye ku bijyanye n’imiyoborere, ubwisanzure bwa politiki n’imigendekere y’ubutabera mu gihugu kimaze imyaka isaga 40 kiyoborwa na Paul Biya.
