Kinyarwanda
English
Swahili
Ambasade ya Israel mu Rwanda yatangije irushanwa rya siyansi n’ikoranabuhanga muri za kaminuza
Ambasade ya Israel mu Rwanda ku bufatanye n'umuryango wa STEM power Africa usasanzwe uteza imbere amasomo ya Siyansi, Ikoranabuhanga n’Imibare muri Afurika yo munsi y’Ubutayu bwa Sahara, washyize hanze irushanwa rishya rizahatanirwa n'abanyeshuri bo muri kaminuza zitandukanye hagamijwe gushyigikira imishinga ishobora gukemura ibibazo bitandukanye.
Nkuko byatangajwe n’ubuyobozi bwa Ambasade ya Israel mu Rwanda kuri uyu wa gatatu tariki ya 29 Ukwakira 2025, biteganyijwe ko iryo rushanwa rigomba gutangira ku wa 6 Ugushyingo uyu mwaka, rikazahuza abanyeshuri bo muri Kaminuza zitandukanye biga amasomo ya siyansi, imibare n’ikoranabuhanga.
Abazaba bari mu irushanwa bazamurika banerekane imishinga, udushya n’ibitekerezo byabo bumva ko byashyigikirwa hagamijwe kubyifashisha mu gukemura bimwe mu bibazo bikunze kugaragara mu nzego z'uburezi, ubuhinzi, ihindagurika ry’ibihe, imari n’izindi.
Mbere y'uko ayo marushanwa atangira, bamwe mu banyeshuri batoranyijwe kuri uyu wa gatatu bahawe amahugurwa abafasha gutekereza neza ku mishinga yabo no kuyinoza mu gikorwa cyabereye kuri Kaminuza ya IPRC Kigali.
H.E. Einat Weiss, Ambasaderi wa Israel mu Rwanda, ubwo yasuraga abo banyeshuri yabasabye kunoza neza imishinga yabo anabafasha kugira ibyo bongeramo muri yo. Weiss yashimye byimazeyo ubuhanga n’ubushobozi bamwe muri abo banyeshuri bagaragaza avuga ko icyatumye iyo gahunda itangira ari uko u Rwanda rumaze kugira urubyiruko rwinshi rufite impano n’ubushobozi mu guhanga udushya mu bya siyansi n’ikoranabuhanga.
Yagize ati “Burigihe mbona ubushobozi bw’urubyiruko rw’u Rwanda mu guhanga udushya. Ni yo mpamvu iri rushanwa twarizanye no mu Rwanda, kugira ngo abafite izo mpano tubafashe kugira icyo zibamarira ariko bamwe tunabifashishe mu gukemura ibibazo by’aha mu gihugu”.
Yakomeje asaba abo banyeshuri gukomeza kwiga no gushakisha amakuru mashya, ku mishinga yabo anabibutsa ko ubushakashatsi n’udushya bitagira umupaka ahubwo ko iyo byitaweho neza bigirira akamaro nyirabyo ndetse bikanafasha sosiyete arimo kubaka ibisubizo birambye.
Espoir Serukiza umuyobozi wa STEM power mu Rwanda, wari unahagarariye icyo gikorwa yavuze ko iyo gahunda igamije gutanga urubuga ku rubyiruko ngo rugaragaze impano zarwo ndetse ko abari biyandikishije muri iryo rushanwa babaye benshi bituma habaho guhitamo imishinga ifatika birangira imishinga 30 ariyo yemerewe kuzahatana.
Kugeza ubu STEM power mu Rwanda ifite laboratwari zirenga 10 zifite ibikoresho bigezweho muri buri karere, aho urubyiruko rufashwa guhuza ubumenyi rwiga mu mashuri n’imikoreshereze y’ikoranabuhanga hagamijwe kubyaza umusaruro ibyo rwiga.
Iki kikaba igikorwa gishyigikirwa kubw’ubufatanye bw’u Rwanda na Israel mu guteza imbere amasomo ya siyansi imibare n’ikoranabuhanga.
