Urubyiruko rwo mu karere ka Rwamagana rwitabiriye Inteko Rusange yarwo yabereye mu kagari ka Nyarusange mu Murenge wa Muhazi mu nzu mberabyombi y'ishuri Center for ChampionTSS, urwo rubyiruko rwaganiriye ku ngingo zitandukanye zirimo iterambere ry'urubyiruko n'uruhare rwarwo muri iryo terambere.

Abitabiriye iyo nama baganiriye ku ngamba zo guhangana n'ibibazo bibangamiye iterambere ryabo.

 Iyo nteko rusange yabaye yitabiriwe n'urubyiruko rwavuye mu mirenge itandukanye yari ifite insanganyamatsiko igira iti "Rubyiruko irinde imyitwarire mibi ugere ku iterambere."

 Ubutumwa bagejejweho n'abayobozi batandukanye barimo Meya Mbonyumuvunyi Radjabu umuyobozi w'Akarere ka Rwamagana, urubyiruko rwasabwe kwirinda imyitwarire yatuma rutakariza icyizere ahubwo ko rugomba guharanira kugira imyitwarire myiza kugirango rugere ku nzozi zarwo.

 Umunyamabanga Nshingwabikorwa w'Akarere ka Rwamagana, Madamu Mutesi Pricah,  yabwiye urubyiruko ko rugomba kuba bandebereho.

Yagize ati "Aho muri mugomba gukora ibikorwa bigaragaza impinduka mu mibereho y'Abanyarwanda. Ibyo nabasaba nk'umwe mu babanye namwe muri iyi nteko, ndabasaba kuba bandebereho. bandebereho ni ukugira uruhare mu gukumira no kurwanya no gutanga amakuru ahari ibikorwa bishobora gutuma urubyiruko rwarohama. Ikindi mbasaba ni ukugira indangagaciro zo kwimana Igihugu cyacu."

 Yakomeje agira ati "Igihugu dufite uyu munsi turasabwa kukirinda, murabizi ko hari abantu bakwirakwiza amakuru atariyo binyuze ku mbuga nkorambaga, mugomba kubirwanya mukanavuguruza izo mvugo z'ibinyoma munyuze ku mbuga nkorambaga nk'urubyiruko.

Umuyobozi w'Akarere ka Rwamagana, Mbonyumuvunyi Radjabu,yasabye urubyiruko kurangwa n'imyitwarire myiza bakirinda ibikorwa bigayitse.

 Yagize ati "Dukeneye abaganga bazatuvura ntahandi bazava uretse muri mwebwe, uwuzavamo umusirikare mwiza kugirango hatazagira uduhohotera ni mwebwe mwicaye aha, ubu hano wasanga harimo Meya w'Akarere ka Rwamagana, uwuzavamo Minisitiri wasanga ari hano, uwuzavamo umudepite cyangwa umusenateri ari hano, ariko ibyo byose bifite ikintu kimwe kibihatse imyitwarire myiza."

Inteko Rusange y'Urubyiruko mu karere ka Rwamagana, yabereyemo ibikorwa byo guhemba urubyiruko rwakoze ibikorwa by'indashyikirwa, Umurenge wa Muyumbu wahembewe guhiga indi mirenge mu kwesa imihigo y'Urubyiruko ya 2024/2025 mu Karere ka Rwamagana.